Goa Fire News: रिवण मार्केट येथे काल रात्री एका हार्डवेअरच्या दुकानाला आग लागली. यामध्ये मोठ्या प्रमाणात नुकसान झाले असून दुकान संपूर्णपणे जळून खाक झाले आहे.

या आगीत तिथेच असलेल्या इतर तीन दुकानांचेही नुकसान झाले असून सदर इमारत धोकादायक स्थितीत आहे. त्यामुळे इतर दुकानमालक आपले सामान तिथून हलवत आहेत.

संबंधित घटनेची माहिती मिळताच आमदार सुभाष फळदेसाई यांनी घटनास्थळी धाव घेत नुकसानग्रस्त मालकांची भेट घेतली. आगीत झालेले नुकसान भरून काढण्यासाठी मदत करण्याचा प्रयत्न करू, असे आश्वासन त्यांनी यावेळी दिले.

शॉर्ट सर्किटमुळे आग लागली असल्याचे सांगण्यात येत आहे. कुडचडे अग्निशमन दलाने आग विझवण्याचे काम केले

दरम्यान, अजून एक आगीची घटना शिगाव येथे घडली आहे. कुळे शिगाव पंचायत परिसरात असलेल्या कचरा शेडला अज्ञातांनी रात्रीत आग लावली. आगीची माहिती मिळताच कुडचडे अग्निशमन दलाला बोलावण्यात आले. जवानांनी घटनास्थळी येऊन आग विझवली असली तरी यामध्ये अनेक मशीनरी जळून खाक झाल्या आहेत. या घटनेत एक कोटीच्या वर नुकसान झाले असल्याचे सांगण्यात येत आहे.