पणजी: गोवा बाल आरोग्यामध्ये प्रगती करत असतानाच एक धक्कादायक बातमी उघड झाली आहे. राज्यात वेगाने घटणारा प्रजननाचा आकडा येणाऱ्या काळात एक चिंतेचा विषय ठरण्याची शक्यता वर्तवली जात आहे. आर्थिक सर्वेक्षण २०२४-२५, नॅशनल फॅमिली हेल्थ सर्व्हे (NFHS) ने सादर केलेल्या डेटाच्या आधारित गोव्यातील प्रजननाचा दर १.३ टक्क्यांपर्यंत घसरला आहे.

गोव्यात गेल्या अनेक वर्षांपासून प्रजननाचा आकडा घटत चालला आहे. वर्ष १९९२-९३ मध्ये १.९ टक्क्यांवरून हाच आकडा १९८८-९९ ते २००५-०६ पर्यंत १.८ टक्क्यांपर्यंत येऊन पोहोचला. यानंतर वर्ष २०१५-१६ मध्ये गोव्यातील प्रजननाचा आकडा १.७३ टक्क्यांवर पोहोचला होता आणि सध्या त्याने १.३ टक्क्यांची नीचांकी पातळी गाठली आहे.

गेल्या काही वर्षांमध्ये गोव्यात अचानक झालेली ही घट राज्यातील भविष्यात येणाऱ्या संभाव्य चिंतांना अधोरेखित करते. गोव्यात सध्या लक्षणीय कमी होणाऱ्या प्रजननाच्या दरामुळे येत्या काही वर्षात लोकसंख्येचे प्रमाण कमी होण्याची शक्यता वर्तवली जात आहे, ज्यामुळे वृद्धत्वाची लोकसंख्या आणि संबंधित आर्थिक आणि सामाजिक आव्हाने उद्भवू शकतात.

बाल आरोग्यामध्ये सध्या गोवा उत्तम कामगिरी बजावतोय. बालमृत्यू आणि पाच वर्षाखालील बालकांचा मृत्यू दर नियंत्रित करण्यात केरळनंतर गोवा दुसऱ्या क्रमांकावर आहे. गोव्यातील बालमृत्यूचे प्रमाण सध्या ५.६ टक्के आहे आणि वर्ष १९९२-९३ मध्ये असलेल्या ३१.९ टाक्यांवरून गोव्याने ही लक्षणीय घट करून दाखवली आहे.