Goa Ferry Boat : डिचोली, चार दिवसांपूर्वी सारमानस फेरीबोट धक्क्यावरील दुर्घटनेनंतर हा फेरीधक्का पुन्हा एकदा चर्चेत आला असून तेथील सुरक्षिततेचा प्रश्न ऐरणीवर आला आहे.

दिवसेंदिवस असुरक्षित आणि धोकादायक बनणाऱ्या सारमानस फेरी धक्क्यावरील अपघात टाळण्यासाठी या फेरी धक्क्यावर आवश्यक त्या उपाययोजना करा, अशी मागणी आता पुढे येत आहे. गेल्या मंगळवारी एका अनपेक्षित घटनेत सारमानस फेरी धक्क्यावर एका कारचालक युवकाचा बळी गेला आहे.

ही घटना आणि त्यापूर्वी गेल्या काही वर्षातील घटनांमुळे या फेरी धक्क्यावरील भीती दिवसेंदिवस वाढत आहे. सारमानस फेरी धक्क्याकडे जाणारा रस्ता आधीच अरुंद आहे. बऱ्याचदा फेरीबोटीत प्रवेश मिळवण्यासाठी वाहनचालकांमध्ये शर्यत लागते.

फेरी धक्क्याकडे जाताना एखादेवेळी वाहनाचा ब्रेक निकामी झाल्यास मोठा अनर्थ घडण्याची शक्यता नाकारता येत नाही. सकाळच्यावेळी सारमानस फेरी धक्क्यावर गृहरक्षक तैनात करून वाहनांवर नियंत्रण आणण्यात येत आहे. हा अपवाद सोडल्यास या फेरी धक्क्यावर सुरक्षिततेच्यादृष्टीने अन्य कोणत्याच उपाययोजना नाहीत.