Goa Farmers: यंदा पावसाने (Rain) कहर केला असून, डिसेंबर महिन्यातही अवकाळी पाऊस पडत असल्याने सत्तरी तालुक्यातील (Taluka) प्रमुख मानले गेलेले सुपारी पीक (Betel nut) संकटात सापडले आहे. असाच पाऊस पुढेही पडत राहिल्यास सुपारी उत्पादनाचे ‘गणित’ बिघडणार आहे.

डिसेंबर महिन्यातही मुसळधार पाऊस पडत असल्याने नवी सुपारी सुकविण्यावर परिणाम झाला आहे. प्रसंगी बागायतदारांना (Farmers) नवी सुपारी घरातील ठराविक जागेत किंवा शेडमध्ये ठेवावी लागली आहे. नवीन सुपारी काढणी नंतर ती सुपारी उन्हात वाळवणे गरजेचे असते. पण, पावसामुळे भयावह परिस्थिती बनली आहे.

दरही जाहीर होण्यास विलंब

परिपक्व झालेली सुपारी पावसानंतर कुळागरात रोज झडत असते. पण सध्या पाऊस पडत असल्याने सुपारी सुकलेली नाही. या एकूण परिस्थितीमुळे पावसामुळे नव्या सुपारी पिकाचे गणितच बिघडले आहे. बागायतदारांनी सुपारीची पहिली काढणी कशीबशी केली होती. आता दुसरी काढणी होण्यास पावसाचा अडथळा ठरत आहे. दरवर्षी दिवाळीत लक्ष्मीपूजन उत्सव झाले की, नवा सुपारीचा दर जाहीर केला जातो. पण पावसामुळे नवी सुपारी सुकलेली नसल्याने नवा दरही जाहीर झालेला नाही

..तर काजू पिकांनाही बसणार फटका

चार घास सुखाचे मिळावेत यासाठी काबाडकष्ट करून कष्टकरी बांधव आजही शेती व्यवसाय टिकवून आहेत. पण, सध्या निसर्गाची साथच मिळत नसल्याने बळीराजा हवालदिल बनला आहे. सांगे भागात हातातोंडाशी आलेली भातशेती अवकाळी पावसामुळे आडवी झाल्याने येथील शेतकरी अडचणीत सापडला आहे. जिथे यंत्राद्वारे भात कापणी करणे शक्य नाही, अशा ठिकाणी मनुष्यबळ वापरून भात कापणीसाठी सज्ज असलेल्या शेतकऱ्यांसमोर आता संकट उभारले आहे.

साधारणतः नोव्हेंबर महिन्यात पाऊस पूर्णपणे माघारी जातो. पण, यंदा डिसेंबर उजाडूनही पावसाचे थैमान सुरू असल्याने शेती पिकाचे नुकसान होत आहे. सांगेतील काही भागात अल्पावधीत कापणीसाठी आलेले पीक काही शेतकऱ्यांनी वेळेत कापणी केले आहे. पण काही जणांचे अजूनही भात पीक तसेच असल्याने आता ते पावसामुळे आडवे झाले आहेत.