Liquor Seized in Goa : पत्रादेवी तपासणी नाक्यावर आज सकाळी अवैधरित्या गोव्याबाहेर नेला जाणारा मोठा दारुसाठा जप्त करण्यात आला आहे. आज गुरुवारी पहाटे 3.30 वाजण्याच्या सुमारास DD 01 H 9228 या क्रमांकाच्या मालवाहू ट्रकमधून बेकायदेशीररित्या दिल्लीला तस्करी केली जाणारी दारु पकडण्यात यश आलं आहे. ट्रकसह  पकडलेल्या दारुची किंमत 28 लाख 53 हजार असल्याची माहिती आहे.

दिल्लीला चोरुन नेण्यात येणाऱ्या गोवा बनावटीच्या दारुच्या 635 बॉक्ससह गाडी जप्त करण्यात आली आहे. याप्रकरणी चालक दीपक राजकुमार याला अकबारी खात्याने ताब्यात घेऊन मोपा पोलिसांच्या ताब्यात दिले आहे.

पेडणे अबकारी सहाय्यक निरीक्षक जयेश बांदेकर यांनी याप्रकरणी माध्यमांना माहिती दिली आहे. ते म्हणाले, दारुची अवैध वाहतूक करणारी गाडी पहाटे 3.30 वाजता पत्रादेवी येथे पोहोचली. अबकारी खात्याच्या अधिकाऱ्यांनी ही गाडी तपासणीसाठी थांबवली. मात्र या गाडीत मोठ्या आकाराचे पुठ्ठे लावण्यात आले होते. त्यामुळे संशय आल्याने अधिकाऱ्यांनी गाडीची कसून तपासणी केली. ज्यात अधिकाऱ्यांना पुठ्ठ्याच्या पुढे दारुचे खोके दिसले. ट्रकमधून हे खोके  काढण्यासाठी पाच कर्मचाऱ्यांना दोन तासांहून अधिकचा वेळ लागला.

तपासणीत गाडीमधील रॉयल ब्लू नावाची बनावट व्हिस्कीचे 635 बॉक्स अधिकाऱ्यांना सापडले. या दारुची बाजारातील किंमत 8 ते 10 लाख रुपये आहे. ही दारु बनावट असून बॉक्स किंवा बाटलीवरील लेबलवर कुठलाही पत्ता नाही. 

याप्रकरणी अधिकाऱ्यांनी संबंधित गाडीचालक आणि मालकास ताब्यात घेऊन पंचनामा केला आहे. गाडीतील माल पेडणे कार्यालयात आणि गाडी दोडामार्ग येथे ठेवण्यात आली आहे.  चालक आणि मालक यांना मोपा पोलिसांच्या ताब्यात देण्यात आले आहे.