मोरजी: सद्या गोव्यात (Goa) निडणुकांपूर्वीचे वारे वाहू लागले आहे. बहुतेक पक्षांची तयारी जोरदार चालू आहे. दसऱ्याच्या शुभ मुहूर्तावर रेव्होलूशनरी गोवन्सच्या (Revolutionary Govans) मांद्रे गटाने मधलामज, मांद्रे येथे आपले ऑफिस सुरू केले असून, या मुहूर्तावर मतदारसंघातील (Mandrem Constituency) काम अधिक जोराने करण्याचे त्यांनी ठरवले आहे. "मांद्रे मतदारसंघात जागेचा प्रश्न आणि त्या जमिनी स्थानिकांकडून विकत घेवून नंतर चाललेली दिल्लीतल्या बिल्डर लॉबी ची दादागिरी, यामुळे स्थानिक लोक कंटाळले आहेत. आम्ही स्थानिकांच्या बरोबर कायम राहू आणि त्यांचे हक्क त्यांना मिळवून देवू", असे आरजीच्या मनोज परब यांनी म्हटले. यावेळी मांद्रे आरजीच्या नेत्या सुनयना गावडे व इतर सदस्य उपस्थित होते. स्थानिकांसाठी त्यांचे दार कायम उघडे असणार असेही त्यांनी सांगितले.

"येथील स्थानिक आमदाराला एका पक्षातून दुसऱ्या पक्षात उड्या मारण्याची सवय झाली आहे आणि लोक या सवयीला कंटाळले आहेत. मुळ गोवेकरांवर होणाऱ्या अन्यायविरुद्ध लढण्यास रेव्होलूशनरी गोवन्स कायम तयार आहे. पोगो बिल हेच गोव्याचे अस्तित्व टिकवण्यासाठी एकमेव उपाय आहे. भाजप सरकार हे अतिशय उन्मत्त आणि हेकेकोर झाले आहे. परप्रांतीय मतदारांना खुश ठेवण्यासाठी हे सरकार गोव्याच्या लोकांवर अन्याय करत आहे. त्यामुळे पुढील निवडणुकीत गोवेकरच यांना घरी बसवतील असा मला ठाम विश्वास आहे. पोगो बिलाची जागृती आम्ही घराघरात जावून करू आणि मांद्रेची जागा आरजीचीच असेल.", सुनयना गावडे यांनी पत्रकारांना संबोधित करताना म्हटले.