Chapora Tourist Accident: राज्यात पर्यटकांचे वाढते अपघात वाहतूक विभागाची डोकेदुखी बनले आहे. पर्यटक मजामस्तीच्या नादात मद्य पिऊन गाड्या चालवतात ज्यामुळे अपघातांच्या घटना वाढल्या आहेत. अशीच एक घटना शापोरामध्ये घडली आहे.

डेहराडून आणि दिल्लीतून गोव्यात फिरायला आलेल्या पर्यटकांनी भाड्याची कार बूक केली होती. दरम्यान, त्यांच्या कारचा अपघात झाला आहे.

शापोरा येथे एका घराबाहेर पार्क केलेल्या कारला पर्यटकांच्या रेंट अ कॅबने जोरदार धडक दिली. यामध्ये पर्यटक जखमी झाले असून त्यांना गोवा वैद्यकीय महाविद्यालयात दाखल करण्यात आले आहे. काल रात्रीच्या सुमारास ही घटना घडली आहे.

माहितीनुसार, कारमधील सर्व पर्यटक हे दारूच्या नशेत असल्यामुळे हा अपघात झाला असे बोलले जात आहे. कारण त्यांच्या कारमध्ये दारूच्या अनेक रिकाम्या बाटल्या सापडल्या आहेत.

पर्यटक जीवाचा गोवा करण्याच्या नादात स्वत:चा आणि इतरांचाही जीव धोक्यात घालत आहेत. अशा वाढत्या घटना वाहतूक पोलिसांसमोर आव्हान बनल्या आहेत.