Goa Drugs Case: सध्या गोव्यात पर्यटन हंगाम सुरु असून देश विदेशीचे पर्यटक गोव्यात येत आहेत. या दरम्यान गुन्हेगारी आणि अपघातांचे प्रमाण देखील वाढत असल्याचे आतापर्यंतच्या निरीक्षणावरून समोर आलंय.

याच संदर्भात एक घटना उत्तर गोव्यातून समोर आलीय. शिवोली येथे क्राईम ब्रांचने 1.5 ग्रॅम गांजा आणि कोकेन पकडले असून या प्रकरणात सहभागी असणाऱ्या प्रणय मोरे नामक मुंबई येथे राहणाऱ्या व्यक्तीला ताब्यात घेतले आहे. जप्त केलेल्या अमली पदार्थाची बाजार किंमत 3.5 लाख असल्याची माहितीही समोर येतेय.

मागील आठवडाभरापूर्वी गोवा पोलिसांच्या अंमली पदार्थ विरोधी पथकाने 10 किलो गांजा बाळगल्याप्रकरणी एकाला अटक केली होती. गिरी, म्हापसा येथे अंमली पदार्थ विरोधी पथकाने छापा टाकत 19 वर्षीय ओडिशाचा रहिवासी असलेल्या व्यक्तीला अटक केली होती.

शिवोली येथे ताब्यात घेण्यात आलेला संशयित अमली पदार्थ घेऊन गोव्यात कधी आला याबाबत अद्याप महिती समजू शकली नाही.

तसेच त्याने हा अमली पदार्थ कुठून आणला? कुणाला देणार होता? याबाबतही कोणतीही माहिती समजू शकली नाहीय. तांत्रिक देखरेख आणि पोलीस अधिकाऱ्यांच्या सतर्कपणामुळे सापळा रचून आरोपीला अटक करण्यात आलीय.