अंमलीपदार्थविरोधी कक्षाच्या पथकाने शनिवारी रात्री उशिरा मोरजी येथील पार्किंग परिसरात ड्रग्सची विक्री करणाऱ्या संशयित समीर सोपटे या तरुणाला अटक केली. त्याच्याकडून 25 ग्रॅम मेथाम्फेटामाईन व 100 ग्रॅम गांजा व दुचाकी जप्त करण्यात आली. बाजारपेठेत त्याची किंमत 2लाख 60 हजार रुपये असल्याची माहिती पोलिस उपअधीक्षक नेर्लोन अल्बुकर्क यांनी दिली.

मोरजी येथील पार्किंग क्षेत्रात ड्रग्सची विक्री करणारे काही तरुण संशयास्पद फिरत असतात, अशी माहिती अंमलीपदार्थविरोधी कक्षाच्या पोलिसांना मिळाली होती. त्यामुळे शनिवार संध्याकाळपासून या कक्षाच्या पथकाने त्या ठिकाणी सापळा लावला होता. काही साध्या वेशातील पोलिस तेथे तैनात करण्यात आले होते.

रात्री उशिरा एक तरुण स्कुटर घेऊन आला व तो ड्रग्स खरेदी करणारे ग्राहक शोधत होता. त्याच्या हालचाली संशयास्पद वाटल्याने पोलिसांनी त्याची झडती घेतली. त्याच्या स्कुटरच्या डिकीमध्ये शोध घेतला असता अंंमलीपदार्थ सापडले. त्याने तो ग्राहकांना विक्री करण्यास आणल्याची कबुली दिली. उपअधीक्षक नेर्लोन अल्बुकर्क यांच्या मार्गदर्शनाखाली निरीक्षक रोहन मडगावकर यांनी ही कारवाई केली. महिला उपनिरीक्षक प्रियंका गारोडी या प्रकरणाचा तपास करत आहेत.