पणजी: कोकण रेल्वे पोलिसांनी गुरूवारी (२० मार्च) मोठी कारवाई करत तब्बल ८.१८४ किलो गांजा जप्त केला आहे. या प्रकरणी एका अल्पवयीन मुलाला ताब्यात घेण्यात आलं आहे. जप्त करण्यात आलेल्या गांजाची एकूण किंमत ८.१८ लाख रुपये असल्याचं पोलिसांनी सांगितलं आहे.

मडगावच्या कोकण रेल्वे स्थानकाच्या प्लॅटफॉर्म क्रमांक ६ वर ही कारवाई करण्यात आली. मुलगा या प्लॅटफॉर्मवर उभा होता. पोलिसांनी मुलाच्या संशयास्पद हालचालींवर लक्ष ठेवून चौकशी केली असता गांजा आढळून आला. त्वरित कारवाई करत पोलिसांनी संबंधित अल्पवयीन मुलाला ताब्यात घेतलं आहे.

चौकशीत मुलगा अल्पयवीन असल्याचं आढळून आल्यानं पोलिसांनी  त्याला अपना घरात पाठवलं आहे. कोकण रेल्वे पोलिस ठाण्याचे पोलीस निरीक्षक सुनिल गुडलर यांच्या मार्गदर्शनाखाली उपनिरीक्षक विप्लव वस्त या प्रकरणाचा अधिक तपास करत आहे. गांजा कुठून आणला तो कुठे नेला जाणार होता, याचाही शोध घेतला जात आहे.

याआधी १५ मार्चला दक्षिण गोव्यातील मडगाव शहरात जुन्या रेल्वे स्टेशनजवळील परिसरात पोलिसांना गांजा पकडण्यात यश मिळालं होतं. गोवा पोलिसांनी केलेल्या या कारवाईत १ लाख ९ हजार रुपये किमतीचा १,०९० ग्रॅम गांजा जप्त करण्यात आलाय. तसेच आरोपीला पोलिसांनी ताब्यात घेतले आहे.

कोकण रेल्वे पोलिसांकडून अवैध धंद्यांविरोधात कठोर पावलं उचलली जात असून, रेल्वे मार्गांद्वारे नशा पदार्थांची वाहतूक रोखण्यासाठी तपासणी अधिक तीव्र करण्यात येत आहे.