मडगाव: वाहतूक नियमांचे उल्लंघन केल्याबद्दलचे एक हजारांचे वाहतूक चलन भरण्याच्या बहाण्याने अज्ञात सायबर ठगाने बाळ्ळी येथील एका इसमाला ६ लाख ८० हजार १५२ रुपयांना गंडा घातला. याप्रकरणी कुंकळ्ळी पोलिसांनी अज्ञाताविरोधात गुन्हा दाखल केला आहे. उपनिरीक्षक आदित्य सावंत पुढील तपास करीत आहे.

अल्केश नाईक हे तक्रारदार आहे. पोलिसांनी दिलेल्या माहितीनुसार, १३ जुलै रोजी रात्री साडेआठ वाजण्याच्या सुमारास अज्ञाताने तक्रारदाराशी व्हॉट्सपद्वारे संपर्क साधला. वाहतूक नियम उल्लंघनाचे एक हजारांचे चलन थकीत असल्याचे सांगून संशयिताने ते भरण्यासाठी अल्केश यांना मोबाईलवर एक एपीके फाईल लिंक पाठवली.

ती लिंक खरी असल्याचे समजून त्यांनी त्यावर क्लिक केले. लिंक ओपन होताच सायबर चोरट्यांनी त्यांच्या मोबाईल आणि बँक खात्याचा ताबा मिळवला. त्यानंतर त्याच्या बँक खात्यातून वेगवेगळ्या ऑनलाईन व्यवहारांद्वारे एकूण ६,८०,१५२ .७३ रुपये काढून घेण्यात आले.