Goa Crime News:सांगे पालिका इमारतीच्या जवळच परप्रांतीय कामगाराचा मृतदेह आढळून आल्याने खळबळ निर्माण झाली आहे. पालिकेच्या जवळ असणाऱ्या एका मोकळ्या खोलीत हा मृतदेह आढळून आला आहे. पोलिसांनी घटनास्थळी दाखल होऊन मृतदेह ताब्यात घेऊन उत्तरीय तपासणीसाठी पाठविण्यात आला.

मिळालेल्या माहितीनुसार, सांगे पालिकेच्या जवळील एका मोकळ्या खोलीत उत्तर प्रदेश येथील कामगाराचा मृतदेह आढळून आला. याबाबत स्थानिकांनी पोलिसांना माहिती दिली. पोलिसांनी घटनास्थळी दाखल होत पंचनामा करुन मृतदेह ताब्यात घेतला. उत्तरीय तपासणीसाठी मृतदेह मडगाव जिल्हा रुग्णालयात पाठविण्यात आला आहे.

समोर आलेल्या अधिकच्या माहितीनुसार, सांगे पालिका इमारतीच्या जवळच एक चाळ आहे. त्या चाळीत असणाऱ्या एका मोकळ्या खोलीत या कामगाराचा मृतदेह आढळून आला आहे. या परिसरात अनेक विविध शॉप आहेत आणि याठिकाणी दारुच्या बाटल्या आणि चिप्सचे पॅकेट्स देखील आढळून आले आहेत. अशापद्धतीने उघड्यावर होणाऱ्या मद्यपानाबाबत स्थानिकांनी सवाल उपस्थित केला आहे.

दरम्यान, कामागाच्या मृत्यूचे गूढ अद्याप कायम आहे. त्याचा नैसर्गिक मृत्यू झाला आहे का त्याचा खून करण्यात आला आहे? याबाबत माहिती समोर आलेली नाही. तसेच, मृतदेह आढळून आलेल्या ठिकाणी नेमके काय घडले? याबाबत पोलिस अधिकचा तपास करत आहेत.