पणजी : गोवा पोलिसांनी पणजी येथील कॉर्तीन परिसरातील पदपुलाजवळ सोमवारी (३ मार्च) मोठी कारवाई करत १५ किलो गांजा जप्त केला आहे. या अंमली पदार्थांची बाजारातील किंमत अंदाजे १५ लाख असल्याचं सांगण्यात येत आहे.

या प्रकरणी ओडिशामधील देवदत्ता नायक आणि वेर्ण्यातील बेंझिल कदम या दोघांना अटक करण्यात आली आहे. प्राथमिक चौकशीत, हे दोघेही मोठ्या प्रमाणावर गांजाची तस्करी करत असल्याचा संशय पोलिसांना आहे.

पोलिसांकडून या तस्करीच्या मागे आणखी कुणाचा हात आहे का? याचीही चौकशी सुरू करण्यात आलीय .

गोवा पोलिसांनी राज्यातील अमली पदार्थांची तस्करी रोखण्यासाठी विशेष मोहीम सुरू केली आहे. या मोहिमेअंतर्गत गोव्यात अनेक ठिकाणी गस्त वाढवण्यात आली असून, संशयित हालचालींवर बारकाईनं लक्ष ठेवलं जात आहे.

गोवा हे पर्यटकांचं आवडतं ठिकाण असल्यानं, अंमली पदार्थ विक्रेत्यांचं नेटवर्क सक्रिय असल्याचं दिसून येत आहे. मात्र, पोलिसांनी अशा तस्करांविरोधात कठोर पावलं उचलण्यास सुरुवात केली आहे.