डिचोली : भंगार वस्तू गोळा करण्याच्या नावाखाली भुरट्या चोऱ्या करणारे एक 'त्रिकूट' पहाटे-पहाटेच डिचोली शहरात फिरत असल्याची धक्कादायक माहिती समोर आहे. एका आस्थापनातील सीसीटिव्ही कॅमेऱ्यात कैद झालेल्या 'फूटेज'वरून हा प्रकार उघड झाला आहे.

(Trio of thieves in bicholim)

या त्रिकूटामध्ये दोन महिलांचा समावेश असल्याचे निदर्शनास आले. या त्रिकूटाकडून आतापर्यंत मोठा हात मारला आहे की नाही, ते समजू शकले नाही. मात्र हा प्रकार पाहता डिचोलीवासियांनी वेळीच सावध राहण्याची गरज आहे.

सीसीटिव्ही फूटेज

पॅकिंगसाठी ठेवलेले बॉक्स गायब होतात म्हणून शहरातील एका आस्थापनाच्या मालकाने मंगळवारी (ता. 2) सकाळी सीसीटिव्ही फुटेज तपासली असता, बॉक्स चोरीस जात असल्याचे त्यांच्या निदर्शनास आले.

मंगळवारी पहाटे साडे चार वाजण्याच्या सुमारास तीनचाकी सामानवाहू सायकलवरून उतरल्यानंतर दोन महिला आस्थापनाच्या आवारात शिरतात. तर सायकलस्वार निघून जातो. थोड्या वेळाने हातात बॉक्स घेऊन त्या महिला निघून जातात. असे दृष्य सीसीटिव्ही कॅमेऱ्यात कैद झाले आहे. पहाटे हा प्रकार घडल्याने भंगार वस्तू गोळा करण्याच्या निमित्ताने चोरीच्या उद्धेशानेच हे त्रिकूट फिरत असल्याचा संशय आहे.