Porvorim News: राज्यातील विविध भागात दोन डझनपेक्षा अधिक घरफोड्या व चोऱ्यांमध्ये गुंतलेल्या अट्टल गुन्हेगार मारिया सांतान बाप्तिसा (५४,बाणावली) याच्यासह दोघांना पर्वरी पोलिसांनी शिताफीने अटक केली. संशयितांना न्यायालयाने ६ दिवसांची पोलिस कोठडी दिली आहे.

चोरलेले दागिने व इतर किंमती वस्तू गोव्यातील काहींना विकल्याची माहिती दिली आहे. काहींना ताब्यात घेऊन चौकशी सुरू असल्याची माहिती पोलिस अधीक्षक अक्षत कौशल यांनी दिली.

पर्वरी पोलिसांनी अटक केलेल्यांची नावे मारिया बाप्तिसा व महम्मद सुफियान (२०, नावेली) अशी आहेत. सुफियान हा वाणिज्य शाखेचा प्रथमवर्ष विद्यार्थी आहे. मारिया याला यापूर्वी कोलवा पोलिसांनी अटक केली असून त्याच्याविरुद्ध पोलिसांत गुन्हे नोंद आहेत तर काही प्रकरणांमध्ये न्यायालयात सुनावणी सुरू आहे.

यावर्षी मे ते सप्टेंबर याकाळात घरफोड्या व चोऱ्या करून संघटित टोळीने पोलिसांची झोप उडवली होती. या चोरट्यांचा शोध घेण्यासाठी उत्तर गोव्यातील पणजी, पर्वरी, म्हापसा व हणजूण पोलिस स्थानकाने तपास पथके तयार करून या चोरट्यांचा शोध घेत होते.

या तपासात अटकेतील गुन्हेगारांची माहिती मिळवल्यानंतर मारियाबाबत संशय वाढला. त्याला पर्वरी पोलिसांनी बाणावलीतून ताब्यात घेऊन केलेल्या चौकशीत नागाळी, बांबोळी, म्हापसा व शिवोलीतील घरफोड्यांमधील समावेश उघड झाला आहे.