उसगाव: गोव्यात एका धक्कादायक घटनेने खळबळ उडाली आहे. उसगाव येथे एका १७ वर्षीय अल्पवयीन मुलाला 'व्हॉयरीझम' म्हणजेच गुप्तपणे चित्रीकरण केल्याप्रकरणी पोलिसांनी ताब्यात घेतले आहे. त्याने ३२ वर्षीय महिलेच्या बाथरूमच्या खिडकीतून मोबाईल फोनने आंघोळ करतानाचा व्हिडिओ काढल्याचा आरोप आहे.

नेमकी काय घडली घटना?

पोलिसांनी दिलेल्या माहितीनुसार, ही महिला आंघोळ करत असताना, तिला बाथरूमच्या खिडकीतून एक मोबाईल फोन आपल्या दिशेने रोखलेला दिसला. हे लक्षात येताच तिने आरडाओरडा केला. तिचा आवाज ऐकून आरोपी तात्काळ घटनास्थळावरून पळून गेला. त्यानंतर महिलेने अज्ञात व्यक्तीविरोधात पोलिसांत तक्रार दाखल केली.

सीसीटीव्ही फुटेजमुळे आरोपीची ओळख पटली

तपासादरम्यान, पोलिसांनी परिसरातील सीसीटीव्ही फुटेज तपासले आणि स्थानिक चौकशी केली. यातून त्यांनी या अल्पवयीन मुलाची ओळख पटवली. पोलिसांनी तात्काळ कारवाई करत त्याला ताब्यात घेतले आणि त्याचा मोबाईल फोन पुरावा म्हणून जप्त केला. पोलिसांनी अल्पवयीन मुलाच्या पालकांना या घटनेची माहिती दिली असून, पुढील तपास सुरू असल्याचे सांगितले आहे.

या घटनेमुळे परिसरात खळबळ उडाली असून, महिलांच्या सुरक्षिततेचा प्रश्न पुन्हा एकदा ऐरणीवर आला आहे. पोलिसांनी अशा प्रवृत्तींवर कठोर कारवाई करावी, अशी मागणी स्थानिक नागरिक करत आहेत.