सरकारी नोकरी मिळवणं हे प्रत्येक तरुणाचं स्वप्न असतं. काही तरुण खूप कष्टानं सरकारी नोकरी मिळवतात तर काहीजण शॉटकटच्या माध्यमातून नोकरी मिळवण्याचा प्रयत्न करतात आणि तिथेच फसतात. असाच काही प्रकार कुर्टी, फोंडा येथून समोर आला आहे. शिक्षिकेच्या नोकरीचे आमिष दाखवून एका महिलेला तब्बल 15 लाखांचा गंडा घातल्याची घटना समोर आली आहे. सागर सुरेश नाईक असे फसवणूक करणाऱ्या पोलिस कर्मचाऱ्याचे नाव आहे. फोंडा पोलिसांनी त्याला तात्काळ अटक केली.

कोट्यवधींचा गंडा!

काही दिवसांपूर्वी, नोकरी देण्याचे आमिष आणि अन्य कारणांवरुन एका महिलेने डिचोलीतील अनेकांना कोट्यवधी रुपयांना टोपी घातल्यामुळे एकच खळबळ उडाली होती. हा कोट्यवधींचा गंडा पोलिस कर्मचाऱ्याने एका महिलेच्या साथीने घातल्याचे कटु सत्य समोर आले होते. संशयित महिलेच्या आमिषाला बळी पडलेल्या पीडितांनी डिचोली पोलिसांत तक्रार करताच पोलिसांनी फरार महिलेसह तिचा साथीदार पोलिस कॉन्स्टेबलविरोधात गुन्हा नोंद केला. संशयित महिलेने डिचोलीतील काही महिला मिळून 20 हून अधिकजणांना पाच कोटींपेक्षा अधिक रुपयांना गंडा घातल्याचे सांगण्यात आले. ही महिला डिचोलीत एका इमारतीमधील फ्लॅटमध्ये राहात होती.

कॉन्स्टेबल ‘मास्टरमाईंड’

या प्रकरणात एक पोलिस कॉन्स्टेबल 'मास्टरमाईंड' असल्याची माहिती समोर आली होती. या कॉन्स्टेबलने संशयित महिलेला डिचोलीत फ्लॅट मिळवून दिला होता. या महिलेच्या आमिषाला बळी पडलेल्या काहीजणांकडून या कॉन्स्टेबलने पैसे घेतल्याची माहिती समोर आली. पोलिस म्हटल्यावर अनेकांनी त्याच्यासह त्या महिलेवरही विश्वास ठेवला होता.