Goa Beach: राज्यात वाढत असलेल्या गुन्हेगारीला आळा घालण्यासाठी न्यायालयाने रात्री 10 वाजल्यानंतर खुल्या पार्ट्यांवर बंदी घातली आहे. त्‍यामुळे सासष्टीतील अनेक समुद्रकिनांऱ्यावर पहाटेपर्यंत सुरू असलेल्या संगीत रजनी पार्ट्यांचे आयोजन आता बंद झाले. त्‍यामुळे रात्री 10 नंतर किनाऱ्यांवर शांतता दिसून येत असून तेथील ग्रामस्‍थांनी समाधान व्यक्त केले आहे. न्‍यायालयाने बडगा दाखविल्‍यानंतर आता पोलिसही सतर्क होऊन कामाला लागले आहेत.

कोलवा किनाऱ्याजवळ राहत असलेल्या नॉबर्ट फर्नांडिस यांनी दिलेल्या माहितीनुसार, या किनाऱ्यावरील अनेक रेस्टॉरंट्‌स, हॉटेल्‍समधून पहाटेपर्यंत ध्‍वनिप्रदूषण होत होते. त्‍यामुळे झोपमोड होत होती. शिवाय आजारी माणसांना खूपच त्रास व्‍हायचा. आता मात्र रात्री येथे शांतता पसरलेली असते.

बेताळभाटी येथील ॲण्‍ड्रू डायस म्हणाले, या किनाऱ्यावर सायंकाळी 7 वाजल्यापासून पार्ट्या सुरू व्‍हायच्‍या. र्हा आवाज एवढा मोठा असायचा की खिडक्यांची दारे हलायची. रात्रीची झोप तर दुर्मीळ झाली होती. गेल्‍या दोन-तीन दिवसांत मात्र दिलासा मिळाला आहे.

तर, केळशी येथील दुमिंग नोरोन्हा यांनी सांगितले की, या किनाऱ्यावरही रात्रीचा धूमधडाका सुरू असायचा. मात्र आता तो बंद झाला आहे. न्‍यायालयाच्‍या निर्णयाने आम्‍हाला सुखाची झोप मिळाली आहे.

थेरॉन डिकॉस्‍टा, कोलवा पोलिस निरीक्षक-

कोलवा पोलिस स्थानकाच्या हद्दीतील शॅक, निवासी हॉटेल्‍स, बारमालक व संबंधितांची बैठक बोलावून पार्ट्या रात्री 10 वाजेपर्यंत बंद करण्याचे सूचित केले आहे. शिवाय सर्व ठिकाणी रात्रीच्या वेळी गस्‍त वाढविण्‍यात आल आहे. मागील दोन दिवसांत एकही तक्रार पोलिस स्थानकात दाखल झालेली नाही.