Goa Crime News: बंद घरे हेरून ती फोडण्‍यात हातखंडा असलेला अट्टल घरफोड्या चिमा पॉल आणि त्‍याचा साथीदार अर्जुन देसाई या दोघांना फातोर्डा पोलिसांनी अटक केली असून त्‍यांच्‍याकडून लाखो रुपये किमतीचे चोरीचे दागिने जप्‍त केले आहेत.

4 डिसेंबर रोजी फातोर्डा येथे राहाणाऱ्या डेबोरा फर्नांडिस यांच्‍या घरी ही चोरी झाली होती. त्‍यात या दोघांनी मिळून 50 लाखांचे सोन्‍याचे दागिने पळविले होते.

यातील चिमा पॉल याला नागपूर येथे तर अर्जुन देसाई याला मडगावातून अटक केल्‍याची माहिती फातोर्डा पोलीस स्‍थानकाचे निरीक्षक दितेंद्र नाईक यांनी दिली. यापूर्वी चिमा पॉल याने अशाचप्रकारे कुडचडे येथील एका लग्‍नाचे घर फोडून लाखो रुपयांचे दागिने पळविले होते.

फातोर्डा येथे झालेली चोरी आणि कुडचडे येथील चोरी यांच्‍या कार्यपद्धतीत साम्‍य दिसून आल्‍याने पोलिसांनी चिमाचा शोध घेण्‍यास सुरुवात केली असता तो नागपूर येथे असल्‍याची माहिती मिळाली.

फातोर्डा पोलिसांनी नागपूर येथे जाऊन चिमाला अटक केल्‍यानंतर त्‍याने या चोरीत आपल्‍याबरोबर अर्जुनही सामील असल्‍याचे सांगितले. काल पोलिसांनी अर्जुन यालाही ताब्‍यात घेतले.

शुक्रवारी त्‍यांना रिमांडसाठी न्‍यायालयासमोर हजर केले. या प्रकरणात चोरीला गेलेले बहुतेक दागिने पोलिसांना सापडले असून दोन्‍ही चोरट्यांनी ते दागिने आपापल्‍या घरात ठेवले होते. मात्र, काही दागिने अजून हस्‍तगत करण्‍याचे बाकी आहेत, अशी माहिती नाईक यांनी दिली.