Goa Crime: राज्य सरकारच्या व्हिक्टिम असिस्टन्स युनिट (VAU) च्या अहवालानुसार, गेल्या 09 वर्षांत राज्यात दर आठवड्याला सरासरी 5 महिला आणि मुले लैंगिक अत्याचाराचे बळी ठरले आहेत.

सरासरी दररोज दोन महिला आणि एक अल्पवयीन अशा गुन्ह्यांना बळी पडतात. किशोरवयीन मुले लैंगिक शोषणाचे मुख्य बळी ठरले आहेत, असेही अहवालात नमूद केले आहे.

युनिटने 2014 पासून 2724 प्रकरणे हाताळली आहेत आणि त्यापैकी 70 टक्के प्रकरणे महिलांशी संबंधित आहेत. VAU च्या डेटानुसार गुन्ह्याला बळी पडलेल्या मुलांपैकी जवळपास 50 टक्के मुले ही 0 ते 15 या वयोगटातील आहेत.

इतर प्रकरणांमध्ये घरगुती हिंसाचार, अपहरण, प्राणघातक हल्ला आणि सायबर गुन्ह्यांचा समावेश आहे. कथित लैंगिक छळ, विनयभंग, अपमानजनक वर्तन आणि छळाच्या घटनांमध्ये वाढ नोंदवली गेली आहे.

दरम्यान, शाळास्तरपासून ते विद्यापीठ स्तरापर्यंत राज्यभरातील 8 शिक्षकांविरूद्ध सहा एफआयआर दाखल करण्यात आले आहे.

या युनिटमध्ये एक समन्वयक व इतर कामगार आहेत. याशिवाय डॉक्टर, फॉरेन्सिक तज्ज्ञ, बालरोगतज्ञ, मानसशास्त्रज्ञ, स्त्रीरोग तज्ज्ञ, वकील आणि इतर व्यावसायिकांचे एक पॅनेल आहे.

लैंगिक अत्याचाराच्या पीडितांना कायदेशीर, भावनिक आणि सामाजिक सहाय्य देण्याचे काम हे युनिट करते.

हे युनिट महिला आणि बाल विकास संचालकांना आणि गोवा राज्य आयोगाला अहवाल सादर करते. बाल न्यायालयाच्या अध्यक्षांना आवश्यकतेनुसार मदत करते.