पणजी: मोरजी येथील ६३ वर्षीय उमाकांत खोत यांच्या मृत्यू प्रकरणात मेरशी येथील अतिरिक्त सत्र न्यायालयाने तीन आरोपींना दिलासा दिला आहे. आरोप निश्चितीच्या टप्प्यावर पुरावे अपुरे असल्याने लोकेश पुट्टास्वामी, रोहित कुमार प्रजापती आणि विजी सुप्पन यांची न्यायालयाने मुक्तता केली.

न्यायमूर्ती शिल्पा पंडित यांनी स्पष्ट केले की, या तिघांचा खोत यांच्या मृत्यूशी थेट संबंध दर्शविणारा कोणताही प्रत्यक्ष पुरावा किंवा साक्ष उपलब्ध नाही. त्यामुळे त्यांच्यावर आरोप निश्चित करण्यास पुरेसा आधार नाही. या प्रकरणातील मुख्य आरोपी अशोककुमार नेदुरुमली हा बेपत्ता असून कोर्टाने (Court) त्‍याला फरार घोषित केले आहे.

तपासाचा केंद्रबिंदू अशोककुमारवर

मांद्रे पोलिसांनी याप्रकरणी गुन्हा नोंदवून तिघांना अटक केली होती. मात्र, न्यायालयाच्या निर्णयानंतर आता तपासाचा केंद्रबिंदू फरार आरोपी अशोककुमार नेदुरुमली याच्यावर राहणार आहे. या प्रकरणाची पुढील सुनावणी १२ ऑगस्ट रोजी होणार आहे.