Amit Patkar कर्नाटकात म्हादई वळविण्यास गोवा प्रदेश काँग्रेसने दर्शविलेला विरोध हा कायम राहणार आहे. कर्नाटकात काँग्रेस सत्तेवर आला तरी त्या भूमिकेत कोणताही बदल होणार नाही, असे मत प्रदेशाध्यक्ष अमित पाटकर यांनी शनिवारी सांगितले.

कर्नाटकात काँग्रेसचे सरकार आल्याने म्हादईविषयी काँग्रेसची भूमिका काय राहणार? याविषयी पत्रकारांनी पत्रकार परिषदेत विचारलेल्या प्रश्‍नावर पाटकर यांनी उत्तर दिले आहे.

परंतु कर्नाटक काँग्रेसने आपल्या जाहीरनाम्यात म्हादईच्या कामासाठी 1 हजार कोटी रुपयांची तरतूद केली असल्याचे निदर्शनास आणून दिल्यानंतर त्यावर पाटकर म्हणाले, त्या-त्यावेळी आम्ही भूमिका मांडू.

दक्षिण गोवा खासदार आणि विरोधी पक्षनेते हे त्याविषयी गोवा काँग्रेसच्यावतीने बाजू मांडतील. परंतु गोवा काँग्रेसने म्हादई पाणी वळविण्यास जो विरोध दर्शविला आहे, तो कायम आहे.

भाजपने अगोदरच म्हादई कर्नाटकला विकली आहे, हे सांगत पाटकर यांनी आपली बाजू सावरण्याचा प्रयत्न केला.