Amit Patkar on PWD minister Nilesh Cabral: गोव्यात बुधवारी आणि गुरूवारी काही भागांमध्ये मॉन्सूनपूर्व पाऊस झाला. पैकी कुडचडे येथे पावसामुळे अनेक ठिकाणी पाणी साठले होते, तर रस्तेही उखडले गेले होते.

त्याची छायाचित्रे काँग्रेस प्रदेशाध्यक्ष अमित पाटकर यांनी सोशल मीडियातून शेअर करत सार्वजनिक बांधकाम मंत्री आणि कुडचडेचे आमदार निलेश काब्राल यांच्यावर निशाणा साधला.

अमित पाटकर यांनी ट्विटरवरून ही छायाचित्रे शेअर केली आहेत. या फोटोंमध्ये दिसते की, अनेक ठिकाणी पावसाचे पाणी साचून तळ्यासदृश्य परिस्थिती निर्माण झाली आहे. तर काही ठिकाणी रस्ते उखडले आहेत. गटारींची दुरवस्था झाली आहे.

मॉन्सूनपूर्व पावसाच्या पहिल्याच दिवशी कुडचडेमध्ये ही परिस्थिती उद्भवली आहे, असे पाटकर यांनी ट्विटरवर म्हटले आहे. सार्वजनिक बांधकाम मंत्र्यांना स्वतःच्या मतदारसंघाची काळजी घेता येत नाही.

पहिल्या पावसात झालेल्या दुरवस्थेतून त्यांची क्षमता कळते. या पावसामुळे हे देखील दिसले आहे की, यंदाच्या पावसात गोवा पावसाच्या पाण्यात बुडणार आहे. हा सर्व 'मिशन टोटल कमिशन'चा परिणाम आहे, अशी टीकाही पाटकर यांनी केली आहे.