मडगाव: पाठलाग करुन एका महिलेची कार अडवून नंतर तिला धमकी दिल्या प्रकरणी काँग्रेसचे नेते ओलेंसिओ सिमोईस त्यांच्या विरोधात फातोर्डा पोलिस ठाण्यात गुन्हा नोंद झाला आहे.

सिमॉईस यांनी धमकी दिल्यानंतर पीडित महिलेने पोलिसांत तक्रार नोंदविली होती. या तक्रारीत तिने ७ जानेवारी रोजी बोर्डा येथे वरील घटना घडल्याचे नमूद केले आहे. संशयित सिमोईस याने आपला पाठलाग केला. नंतर आपली जीप कारसमोर आणून कार अडविली व नंतर आपल्याला धमकी दिल्याचे तिने तक्रारीत नमूद केले आहे.

सिमोईस याने बोर्डा फातोर्डा येथील कुंदे कॉम्प्लेक्सनजीक पीडितेच्या गाडीसमोर काळ्या रंगाची स्कॉर्पिओ गाडी आडवी घालत महिलेला अडवले. त्यानंतर पीडितेला धमकी दिली, असे तक्रारीत म्हटले आहे.

पोलिस निरीक्षक नेथॉन आल्मेदा यांच्या मार्गदर्शनाखाली उपनिरीक्षक प्रियंका नाईक पुढील तपास करीत आहेत.