Goa Politics

वास्कोचे माजी आमदार कार्लुस आल्मेदा यांनी पुन्हा भाजपात प्रवेश केला आहे. प्रदेशाध्यक्ष सदानंद शेट तानावडे, मंत्री माविन गुदिन्हो, आलेक्स सिक्वेरा आणि आमदारा कृष्णा दाजी साळकर यांच्या उपस्थितीत आल्मेदा यांनी पक्षप्रवेश केला.

यावेळी सदानंद तानावडे यांनी राज्यातील दोन्ही जागा भाजपच जिंकेल असा विश्वास व्यक्त केला. तसेच, काँग्रेस दिशाहीन असल्याचा आरोप तानावडे यांनी केला.

वास्कोचे माजी आमदार कार्लुस आल्मेदा यांनी भाजपला रामराम ठोकून काँग्रेसमध्ये प्रवेश केला होता. 2022ची विधानसभा निवडणूक त्यांनी काँग्रेसच्या तिकीटावर लढवली होती. दरम्यान, आल्मेदा यांनी पुन्हा भाजपमध्ये घरवापसी केली. पणजीतील एका कार्यक्रमात आल्मेदांनी समर्थक नगरसेवकांसमवेत भाजपात पक्ष प्रवेश केला.

भाजपने राज्याचा ज्या पद्धतीने विकास केला आहे त्याचे मी कौतुक करतो. त्यामुळेच मी पुन्हा भाजपमध्ये सामील होत असल्याचे मत आल्मेदा यांनी व्यक्त केले.

यावेळी प्रदेशाध्यक्ष सदानंद शेट तानावडे यांनी काँग्रेस दिशाहीन पक्ष असल्याचे म्हणत, राज्यातील दोन्ही जागा जिंकण्याचा विश्वास व्यक्त केला.

काँग्रेस दिशाहीन झाल्याने ते उमेदवार ठरवू शकत नाहीत. प्रत्येकाला उमेदवार व्हायची इच्छा असल्याने ते स्वतंत्रपणे प्रचार करत आहेत. त्यांचा उमेदवार कोण असेल याची आम्हाला पर्वा नाही. गोव्यातील दोन्ही जागा आम्हीच जिंकू, असा विश्वास तानावडे यांनी व्यक्त केला.

माजी मुख्यमंत्री लक्ष्मीकांत पार्सेकर आणि उत्पल पर्रीकर यांना भाजपात घ्यायचे की नाही. याचा निर्णय केंद्रीय नेते घेतील. असेही तानावडे यांनी स्पष्ट केले.

दरम्यान, आल्मेदा पुन्हा भाजपमध्ये आल्याने राज्यातील अल्पसंख्यांक भाजपसोबत असल्याचा दावा मंत्री माविन गुदिन्हो यांनी केला. काँग्रेसला उमेदवार देखील जाहीर करता येईना, भाजप गोव्यात अधिककाळ राज्य करेल, असे माविन म्हणाले.