वास्को: अखिल भारतीय काँग्रेस समितीचे ज्येष्ठ नेते मल्लिकार्जुन खर्गे यांच्या वाहनावर काळे झेंडे दाखवत हल्ला करणाऱ्या भाजप युवा मोर्चाच्या कार्यकर्त्यांविरुद्ध एफआयआर दाखल करावा, अशी मागणी गोवा प्रदेश काँग्रेस अनुसूचित जाती समितीने केली.

पणजी येथील गोवा प्रदेश काँग्रेस कार्यालयात शुक्रवारी (ता. २१) समितीचे अध्यक्ष विठू मोरजकर, मोहन जाधव, आयुष केरकर, महेश मोचेमाडकर आणि जितेंद्र गावकर यांनी पत्रकार परिषद घेत ही मागणी केली. दाबोळी विमानतळावर खर्गे यांच्या वाहनावर भाजप युवा मोर्चाच्या कार्यकर्त्यांनी केलेल्या कथित हल्ल्याचा निषेध करताना मोरजकर यांनी संबंधित कार्यकर्त्यांना भाजपने योग्य मार्गदर्शन करावे, अशी मागणी केली.

भाजपमध्ये आता शिस्त राहिलेली नाही. हा पक्ष माजी पंतप्रधान अटलबिहारी वाजपेयी आणि ज्येष्ठ नेते लालकृष्ण अडवाणी यांच्या विचारांचा राहिलेला नाही, असा आरोप त्यांनी केला.ज्येष्ठ नेत्याच्या वाहनावर अशा प्रकारे तुटून पडणाऱ्या युवा मोर्चाच्या कार्यकर्त्यांकडून ज्येष्ठांचा आदर राखला जात नसल्याचे मोरजकर म्हणाले.

खर्गे हे अनुसूचित जातीचे प्रतिनिधित्व करतात. त्यामुळे त्यांच्या वाहनावर झालेला हल्ला हा एका प्रकारे बहुजन समाजावर केलेला हल्ला असल्याचा आरोप मोरजकर यांनी केला. या प्रकरणी राज्य गृह विभागाने तातडीने एफआयआर दाखल करावी, अशी मागणी त्यांनी केली.