कोलवाळ: कोलवाळ येथील मध्यवर्ती कारागृहात गांजाचा पुरवठा करण्याचा प्रयत्न उधळून लावत गोवा पोलिसांनी मोठी कारवाई केली. या प्रकरणी अल्पवयीन मुलासह चौघांचा समावेश असून, तीन संशयितांना अटक करण्यात आली आहे. ही घटना 14 जून रोजी घडली.

मिळालेल्या माहितीनुसार, संशयितांनी गांजाचे बॉलच्या आकाराचे तब्बल सात गोळे तयार करुन कारागृहाच्या आतमध्ये फेकण्याचा प्रयत्न केला गेला. मात्र, कारागृह प्रशासनाच्या सतर्कतेमुळे हा कट उधळून लावण्यात आला. या सात गोळ्यांमधून एकूण दीड किलो गांजा जप्त करण्यात आला आहे.

दरम्यान, तपासाअंती पोलिसांनी तिघांना अटक केली असून चौथा संशयित हा अल्पवयीन आहे. त्याच्याविरोधातही संबंधित कायद्याअंतर्गत कारवाई करण्यात येणार असल्याचे पोलिस सूत्रांनी सांगितले. सध्या या प्रकरणाचा तपास सुरु असून अधिक चौकशी केली जात आहे. गोव्यातील (Goa) तुरुंगात अशा प्रकारे अमली पदार्थांची तस्करी रोखण्यासाठी पोलिस यंत्रणा अधिक दक्ष झाली आहे. या प्रकरणामुळे कारागृहाच्या सुरक्षेवर पुन्हा एकदा प्रश्नचिन्ह उभे राहिले आहे.