पणजी: मडगाव येथील कथित बलात्कार प्रकरणी पीडितेने जबाब बदलल्याने एकूणच प्रकरणाची संपूर्ण सत्यता तपासली जाईल. पोलिसांना सखोल चौकशीचे आदेश देण्यात आले आहेत. ही मानवी तस्करीची घटना आहे का त्याचीही पूर्ण पडताळणी होईल, अशी स्पष्ट ग्वाही मुख्यमंत्री प्रमोद सावंत यांनी गुरुवारी (दि. २० मार्च) दिली.

याच प्रकरणात शबरीश मांजरेकर (रा. बड्डे, वय ३२) याला अटक करण्यात आली आहे. पीडित महिलेला मदतनीस (केअर टेकर) म्हणून चांगल्या पगाराची नोकरी व राहण्याची सोय उपलब्ध करून देण्याच्या बहाण्याने गोव्यात बोलावल्याचा आरोप शबरीश मांजरेकर ऊर्फ अशोक मांजरेकरवर आहे. त्यानुसार मडगाव पोलिसांनी गुरुवारी त्याला अटक केली.

मांजरेकर याने 'त्या' महिलेची फसवणूक केल्याचा तसेच कोंब येथील एका कुटुंबाकडून रक्कम घेतली पण प्रत्यक्षात त्या युवतीला दिली नाही, अशीही तक्रार आहे. परवानाधारक कंत्राटदार असल्याचे भासवून कामाला लावण्याचे आश्वासन देत परराज्यांतून मुली आणत असल्याचा मांजरेकरवर आरोप आहे, अशी माहिती दक्षिण गोवा पोलिस अधीक्षक टिकम सिंग यांनी दिली.