म्हापसा: सागरी जैवविविधतेच्या संवर्धनासाठी पुढाकार घेणारा युवा मच्छीमार अर्नोल्ड डिसिल्‍वा याच्या कार्याची दखल घेत मुख्यमंत्री डॉ. प्रमोद सावंत यांनी त्याची भेट घेऊन संवाद साधला आणि त्याचे कौतुक केले.

मासेमारी करताना जाळ्यात सापडणाऱ्या अंडी असलेल्या मादी खेकड्यांना बाजारात न विकता पुन्हा समुद्रात सोडण्याचे काम अर्नोल्ड करतो. त्यामुळे खेकड्यांची पैदास वाढण्यास तसेच सागरी परिसंस्थेचा समतोल राखण्यास मदत होते.

यावेळी मुख्यमंत्र्यांनी अर्नोल्डच्या मासेमारीच्या पद्धतीची माहिती घेत त्याला भावी वाटचालीसाठी शुभेच्छा दिल्या. त्याच्या या उपक्रमाचे सर्व स्तरांतून स्वागत होत असून, इतर मच्छीमारांनीही त्यापासून प्रेरणा घ्यावी, असे आवाहन करण्यात येत आहे.