पणजी: राज्‍य सरकारने नोकरीच्‍या संधी उपलब्‍ध करून न दिल्‍यामुळेच अनेकांना रोजगारासाठी पोर्तुगालसह विविध देशांमध्‍ये जावे लागत आहे. अशा विदेशात काम करणाऱ्या गोमंतकीयांना दुहेरी नागरिकत्‍व देण्‍यात यावे, अशी मागणी आमदार तथा गोवा फॉरवर्डचे अध्‍यक्ष विजय सरदेसाई यांनी केली.

पणजीतील कार्यालयात गुरुवारी घेतलेल्‍या पत्रकार परिषदेत ते बोलत होते. गोव्‍यात रोजगाराच्‍या संधी उपलब्‍ध नसल्‍यामुळे अनेक गोमंतकीयांनी गोवा सोडला. अनेक देशांमध्‍ये जाऊन ते काम करीत आहेत. परंतु, ते आपली पाळेमुळे विसरलेले नाहीत.

गोव्‍याशी त्‍यांचे असलेले भावनिक नाते कायम आहे. विदेशात राहूनही त्‍यांनी आपले गोंयकारपण आणि गोव्‍याची ओळख जपलेली आहे. तरीही त्‍यांना दुहेरी नागरिकत्‍व नाकारण्‍यात येत असल्‍यामुळे त्‍याचे परिणाम त्‍यांच्‍या कुटुंबांवर होत आहेत.

त्‍यामुळे केंद्र सरकारने गोव्याचा इतिहास लक्षात घेऊन पोर्तुगीज नागरिकत्व असलेल्या गोमंतकीयांसाठी विशेष धोरण तयार करावे आणि दुहेरी नागरिकत्‍व बहाल करावे, असे सरदेसाई म्‍हणाले.

दरम्‍यान, विदेशात असलेल्‍या गोमंतकीयांना दुहेरी नागरिकत्व दिल्याने गोवा आणि परदेशातील गोमंतकीय यांच्यातील संबंध अधिक दृढ होतील आणि केवळ आर्थिक कारणामुळे स्थलांतर करण्यास भाग पडलेल्या गोमंतकीयांना न्याय मिळेल, असेही त्‍यांनी नमूद केले.