Goa Christmas 2023: राज्यभरात आज ख्रिसमसचा उत्साह पाहायला मिळाला. राज्यातील विविध चर्चमध्ये येशू जन्माचा उत्सव साजरा केला गेला. काल पर्यंत चर्चना आकर्षक रंगरंगोटी, रोषणाई सारखी जय्यत तयारी करण्यात आली होती.

अखेर रात्री 12 वाजता राज्यातील विविध चर्चमध्ये येशू जन्माचा उत्सव साजरा करण्यात आला. राजधानी पणजीतील इमॅक्युलेट कन्सेप्शन चर्चमध्ये ख्रिसमसच्या निमित्ताने ख्रिस्ती बांधवांनी मोठ्या संख्येने सामूहिक प्रार्थनेत भाग घेतलेला दिसून आला.

चर्चमध्ये प्रभू येशूच्या आगमनाचं गीतही गायलं. यानंतर चर्चच्या फादरनी सर्वांना आशीर्वाद देवून, ख्रिसमसच्या शुभेच्छा दिल्या.

तर डिचोलीतील चर्चमध्येही ख्रिस्ती बांधवांनी सामूहिक प्रार्थना केली. येशू ख्रिस्ताच्या जन्माच्या कहाणीवर आधारित देखावे तयार करण्यात आले होते.

दरम्यान भारतासह जगभरात ख्रिसमसचा उत्साह पाहायला मिळतोय. विविध चर्चमध्ये येशू जन्माचा उत्सव साजरा केला जात असून चर्चना आकर्षक रोषणाई करण्यात आल्याचं चित्रही दिसतंय.

चैतन्य, आनंद आणि उत्साहाचं प्रतिक असलेला ख्रिसमस या सणाला संपूर्ण ख्रिश्चन समाजात मोठं महत्व असून 25 डिसेंबर हा दिवस प्रभू येशूंचा जन्मदिवस म्हणून साजरा केला जातो.