IIT Goa : नियोजित आयआयटी प्रकल्‍प हा दक्षिण गोव्यातच होणार आहे. त्यासाठी सरकारतर्फे जागेचा शोध सुरू आहे, असे मुख्यमंत्री डॉ. प्रमोद सावंत यांनी आज एका कार्यक्रमानंतर पत्रकारांनी विचारलेल्या प्रश्‍नाला उत्तर देताना सांगितले.

सांगे येथील नियोजित आयआयटी प्रकल्‍प जवळजवळ रद्द झाल्यातच जमा आहे. आयआयटीसाठी सांगे येथे निश्‍चित केलेली जागा या कॅम्पससाठी पुरेशी नाही. त्यातील बहुतांश जमीन ही डोंगराळ भागात असल्याने केंद्र सरकारने त्यास मंजुरी दिलेली नाही. त्यामुळे सरकारने आता दुसरी जागा शोधण्याची प्रक्रिया सुरू केली आहे.

दरम्यान, आयआयटी प्रकल्‍प सांगेतच व्‍हावा यासाठी यापूर्वी माजी आमदार प्रसाद गावकर यांनी सरकारकडे प्रयत्‍न केले होते. त्यानंतर सांगेचे विद्यमान आमदार तथा मंत्री सुभाष फळदेसाई यांनी तर आयआयटी सांगेतच होणार असा दावा केला होता. त्यासाठी सुमारे ८ लाख चौरस मीटर जमीनही पाहण्यात आली होती.

आयआयटी कॅम्पससाठी सुमारे १० लाख चौरस मीटरपेक्षा अधिक जमिनीची आवश्‍यकता आहे. सांगेत असलेल्या ८ लाख चौरस मीटर जागेपैकी काही जागा डोंगराळ भागात आहे. त्यामुळे या जागेला केंद्राने संमती दिलेली नाही.