CM Pramod Sawant:

एका वृत्तवाहिनीच्या कार्यक्रमाला उपस्थित राहण्यासाठी मुख्यमंत्री डॉ. प्रमोद सावंत यांनी आज दुपारी दिल्ली गाठली आणि दक्षिण गोवा लोकसभा मतदारसंघातील उमेदवारीचा विषय पुन्हा ताजा झाला. मुख्यमंत्र्यांसोबत भाजपचे प्रदेशाध्यक्ष सदानंद शेट तानावडे हेही दिल्लीला जाणार होते.

मात्र, विमान चुकल्याने तानावडे हे त्या समारंभात मुख्यमंत्र्यांसोबत उपस्थित राहण्यासाठी दिल्लीला पोचू शकले नाहीत. भाजपने सर्वत्र ‘कमळ’ ही निशाणी म्हणजेच उमेदवार, असे मानून प्रचार सुरू केला आहे. त्यामुळे उमेदवार कोण हा विषय गौण ठरतो, असे मानणाऱ्या भाजपने आता उमेदवाराची निवडून येण्याची क्षमता हा निकष उमेदवारीसाठी लावणे सुरू केले आहे.

दिल्लीला जाण्यापूर्वी मुख्यमंत्री व प्रदेशाध्यक्षांनी भाजपला मोर्चाची बैठक पणजीतील कार्यालयात घेतली होती. त्यांची मतेही यासंदर्भात जाणून घेतली होती. त्यामुळे मुख्यमंत्र्यांच्या दिल्ली दौऱ्याचा संबंध उमेदवारीशी लावण्यात येत आहे.
सुरवातीला प्रदेश पातळीवरून पाठवलेल्या नावांचा विचार उमेदवारीसाठी केला जाईल, असे वाटत होते. त्यानंतर महिलांची नावे या उमेदवारीसाठी सुचवावीत असे सांगण्यात आले होते.

'उमेदवारीबाबत ‘नरो वा कुंजरोवा’

भाजप पक्षश्रेष्ठी देतील तो उमेदवार निवडून आणण्याची जबाबदारी प्रदेश पातळीवर स्वीकारावी लागेल, असे सांगण्यात येत होते. महिलांची नावे मागवून घेतली, याचा अर्थ केवळ महिलांचाच विचार उमेदवारीसाठी केला जाईल असे नाही, अशी सारवासारव अलीकडच्या काळात मुख्यमंत्री आणि प्रदेशाध्यक्ष करू लागले आहेत. त्यामुळे दक्षिण गोव्यातून भाजपचा उमेदवार कोण, याची उकल मुख्यमंत्र्यांच्या दिल्ली दौऱ्यानंतर तरी होईल का, याविषयी उत्सुकता आहे.