डिचोली: विजयादशमीनिमित्त (Dussehra 2021) यंदाही राष्ट्रीय स्वयंसेवक संघातर्फे (RSS) डिचोलीत (Bicholim)'दसरा संचलन' चे आयोजन करण्यात आले होते. या संचलन मिरवणुकीला यंदाही उत्स्फूर्त प्रतिसाद मिळाला. राज्याचे मुख्यमंत्री डॉ. प्रमोद सावंत (CM Pramod Sawant) हेही या संचलनात उत्साहात सहभागी झाले होते. बोर्डे येथील कोराटीच्या मैदानावरून या संचलनाला सुरवात झाली. बोर्डे वडाजवळून भायलीपेठमार्गे जुन्या बसस्थानकाजवळून छत्रपती शिवाजी महाराज मैदानाला वळसा घालून आतीलपेठहून सोनारपेठमार्गे हिराबाई स्मृती सभागृहा जवळ येताच संचलनाची सांगता झाली.

मुख्यमंत्रीही संघाच्या वेषात

खाकी पॅन्ट, सफेद शर्ट आणि डोक्यावर टोपी असा संघाचा वेष परिधान आणि दांडा घेऊन मुख्यमंत्री डॉ. प्रमोद सावंत हे या संचलन मिरवणुकीत सहभागी झाले होते. अन्य स्वयंसेवकांबरोबर त्यांनीही जवळपास अर्धा तास पायपीट केली.

डिचोलीचे आमदार तथा सभापती राजेश पाटणेकर हे प्रत्यक्ष संचलनात सहभागी झाले नव्हते. मात्र त्यांनी उपस्थित राहून संचलनाचा आस्वाद घेतला.