पणजी: राज्याचे मुख्य निवडणूक अधिकारी कुणाल यांनी आज राजकीय पक्षांच्या प्रतिनिधींसमवेत आल्तिनो येथे बैठक घेऊन चर्चा केली. शांततापूर्ण व मोकळ्या वातावरणात विधानसभा निवडणूक होण्यासाठी केलेल्या सहकार्याबद्दल कुणाल यांनी सर्वांचे आभार मानले. बैठकीच्या अध्यक्षस्थानी कुणाल हेच होते.

तसेच अतिरिक्त मुख्य निवडणूक अधिकारी नारायण सावंत, उपमुख्य निवडणूक अधिकारी संगीता नाईक व मनोहर कारेकर आदी यावेळी उपस्थित होते. विविध पक्षांच्या प्रतिनिधींनी निवडणूकविषयक अनुभव व्यक्त केले. भाजपचे प्रतिनिधी पुंडलीक राऊत देसाई, काँग्रेसचे आल्तिन गोम्स यांनी मुख्य निवडणूक अधिकाऱ्यांनी निवडणूक काळात केलेले सहकार्य व मार्गदर्शन याबद्दल प्रशंसा केली. मगो पक्षातर्फे गौरव नाईक उपस्थित होते. लोकशाही प्रक्रिया आणि संस्थांना मजबूत करणे ही मतदार तसेच सरकार यांची समान जबाबदारी आहे असे कुणाल म्‍हणाले.