पणजी: चिखली येथील एका 72 वर्षीय ज्येष्ठ नागरिकाला ऑनलाईन सायबर चोरट्याने सव्वा लाख रुपयांहून अधिकचा गंडा घातल्याची धक्कादायक घटना समोर आली. जोसेफ मारियो लोपेस असे फसवणूक झालेल्या व्यक्तीचे नाव असून एका सुपरमार्केटचा कर्मचारी असल्याचे भासवून चोरट्याने त्यांना आपल्या जाळ्यात ओढले. या घटनेमुळे दक्षिण गोव्यात पुन्हा एकदा सायबर सुरक्षेचा प्रश्न ऐरणीवर आला आहे.

मिळालेल्या माहितीनुसार, सायबर चोरट्याने लोपेस यांच्याशी संपर्क साधला आणि आपण एका नामवंत सुपरमार्केटमधून बोलत असल्याचे सांगितले. "बँकिंग व्यवहार अधिक सोपे आणि जलद होतील," असे आमिष दाखवून चोरट्याने लोपेस यांना एका लिंकवर क्लिक करण्यास प्रवृत्त केले. ही लिंक प्रत्यक्षात फसवणुकीचा सापळा होती. चोरट्याच्या गोड बोलण्याला भुलून लोपेस यांनी त्यांच्या क्रेडिट कार्डचे गोपनीय माहिती शेअर केली. माहिती शेअर करताच, काही क्षणांतच त्यांच्या बँक खात्यातून 1,50,299 रुपये डेबिट झाले. आपली फसवणूक झाल्याचे लक्षात येताच लोपेस यांनी तत्काळ पोलिसांत धाव घेतली.

वास्को (Vasco) पोलिसांनी याप्रकरणी भारतीय न्याय संहितेच्या कलम 319(2) अंतर्गत गुन्हा दाखल केला. पोलीस निरीक्षक वैभव नाईक आणि उपअधीक्षक गुरुदास कदम यांच्या मार्गदर्शनाखाली पोलीस उपनिरीक्षक निखिल देसाई या प्रकरणाचा अधिक तपास करत आहेत. डिजिटल युगात ज्येष्ठ नागरिकांना लक्ष्य करण्याचे प्रमाण वाढत असल्याने अनोळखी लिंकवर क्लिक न करण्याचे आणि बँक तपशील कोणाशीही शेअर न करण्याचे आवाहन पोलिसांनी केले आहे.