राज्यात सध्या 'कॅश फॉर जॉब' प्रकरणावरुन राजकीय वातावरण चांगलंच तापलं आहे. विरोधक सातत्याने सत्ताधारी सावंत सरकारला निशाण्यावर घेत आहेत. या प्रकरणात सावंत सरकारमधील मंत्री, आमदार सामील असल्याचा घणाघात विरोधकांकडून केला जात आहे.

यातच, सावंत सरकारमधील आमदार गणेश गावकर यांचे नाव या प्रकरणात आल्याने विरोधकांच्या टीकेला अधिक मजबूती मिळाली आहे. गावकर यांच्या विरोधात कुळे पोलिस ठाण्यात तक्रार दाखल करण्यात आली. याच पार्श्वभूमीवर डिचोलीचे माजी आमदार नरेश सावळ यांनी या प्रकरणाच्या तळाशी जावून मुख्यमंत्र्यांनी दोषींना कठोरातील कठोर शिक्षा देण्याची मागणी केली.

राणे, कामत, ढवळीकरांनी नोकऱ्यांसाठी कधीच पैसे घेतले नाहीत!

दरम्यान, 2012 पर्यंत मोठ्याप्रमाणात नोकऱ्या दिल्या गेल्या पण अशाप्रकारे पैसे कुणाकडूनच घेतले गेले नाही. प्रतापसिंह राणे, विश्वजित राणे, दिगंबर कामत, सुदिन ढवळीकर यांनी कधीच नोकरी देण्यासाठी पैसे घेतले नाही. परंतु आताची परिस्तिथी बघितली तर भविष्यकाळ डेंजर झोनमध्ये आहे. मुख्यमंत्र्यांनी या प्रकरणाच्या तळाशी जाऊन मुख्य दोषींना शोधून काढणे गरजेचे असल्याचे डिचोलीचे माजी आमदार नरेश सावळ म्हणाले.

मुख्यमंत्री काय म्हणाले?

कॅश फॉर जॉब प्रकरणात पैसे घेणारे कुठल्याही पक्षाचे असले तरी त्यांच्यावर कारवाई होणारच, असे मुख्यमंत्री डॉ. प्रमोद सावंत यांनी निक्षून सांगितले आहे. पैसे घेऊन फसवणूक केली असल्यास तक्रार करावी, आम्ही दोषींवर कठोर कारवाई करु. सोबतच दोषींची मालमत्ता जप्त करुन तक्रारदाराला त्यांचे पैसेही मिळवून देऊ, अशी ग्वाही मुख्यमंत्र्यांनी दिली आहे. या प्रकरणात आतापर्यंत 18 जणांना अटक करण्यात आली आहे. तसेच, या प्रकरणात सहभागी असलेल्या सरकारी कर्मचाऱ्यांनाही निलंबित करण्यात येईल, असे मुख्यमंत्र्यांनी स्पष्ट केले आहे.