Panaji Air Quality

पणजी: गोव्याच्या राजधानीतील हवा प्रदूषित झाली आहे. मंगळवारी (१९ नोव्हेंबर) दुपारी एक वाजता राजधानी पणजीचा हवा गुणवत्ता निर्देशांक (AQI) ३३२ एवढा नोंदवला गेला. त्यामुळे राजधानीत आता श्वास घेणे म्हणजे दिवसाला तीन सिगारेट ओढल्या सारखं झालं आहे, अशी आकडेवारीसमोर आली आहे.

वेगाने होणारे शहरीकरण यामुळे राजधानी पणजी हवा प्रदूषणाचा सामना करत आहे, असे गोवा प्रदूषण नियंत्रण मंडळाने म्हटले आहे. राज्यातील कुडचडे आणि लोटली या भागात देखील हवेचा दर्जा निकृष्ट असल्याची आकडेवारी समोर आली आहे. गेल्या काही महिन्यांच्या तुलनेत राज्यातील हवा प्रदूषणात वाढ झाल्याचे दिसून आले आहे.

गोव्यातील हवेची गुणवत्ता अद्याप चिंताजनक नाहीये. पणजीतील AQI जास्त आहे. याचे कारण वाहनांमुळे होणारे प्रदूषण, बांधकाम कामे आणि हिवाळा (हवेचे कमी प्रमाण आणि हवेतील आद्रता) असल्याचे दिसून येते, अशी माहिती प्रदूषण मंडळाचे अध्यक्ष महेश पाटील यांनी टाईम्स ऑफ इंडियाला दिली आहे.

श्वसनाचे आजार असलेल्या व्यक्तीने पणजीत श्वास घ्यायला त्रास होऊ शकतो, असेही AQI च्या संकेतस्थळावर दिलेल्या माहितीत म्हटले आहे. गोवा प्रदूषण मंडळाने नोंदवलेल्या आकडेवारीनुसार राजधानीत ऑक्टोबर ११ ते नोव्हेंबर ११ या कालावधीत पीएम १० आणि पीएम २.५ वाढल्याचे दिसून येते. डोळ्यांना न दिसणारे हवेतील हे कण श्वास घेण्यास त्रास निर्माण करु शकतात.

वाहन आणि औद्योगिक कंपन्यांमधून बाहेर पडणाऱ्या नायट्रोजन ऑक्साईडमुळे देखील श्वास घ्यायला त्रास होऊ शकतो. एका महिन्यात नायट्रोजनची पातळी ३२.३ वरून ३८.४ एवढी झाली आहे. स्मार्ट सिटीच्या कामामुळे देखील पणजीत मोठ्या प्रमाणावर खोदकाम झाले यामुळे सर्वत्र धुळेचे साम्राज्य पाहायला मिळाले.