Goa News: श्रीस्थळ पंचायतीची जैवविविधता व्यवस्थापन समिती निवडण्यासाठी बोलावलेली ग्रामसभा पंचायत मंडळाला गदारोळामुळे दुसऱ्यांदा तहकुब करावी लागली. मात्र, तत्पूर्वी यापुढे जैवविविधता समिती नियुक्तीसाठी सरपंच व पंचायत मंडळाला अधिकार देण्यासंबंधी ठराव संमत करण्यात आला.

23 ऑक्टोबरला झालेल्या बैठकीत जैवविविधता समिती निवडीवेळी दोन गट पडून प्रकरण हातघाईवर आल्याने पंचायत सचिवांनी ग्रामसभा तहकुब केली होती. पंचायत सभागृहात ती तहकुब केलेली ग्रामसभा पुन्हा बोलाविण्यात आली. त्यावेळी जैवविविधता समितीत राहण्यास इच्छूक असलेल्या अकरा उमेदवारांनी आपली नावे दिली.

मात्र, त्यांना कोणीच अनुमोदन दिले नाही. त्यामुळे ग्रामसभेत मोठा गोंधळ होऊन प्रकरण हातघाईवर येण्याची शक्यता लक्षात घेऊन सरपंच सेजल गावकर यांनी ग्रामसभा तहकुब केल्याची घोषणा केली. मात्र, त्यापूर्वी यापुढे जैवविविधता समिती नियुक्त करण्यासाठी सरपंच व पंचायत मंडळाला अधिकार देण्यासंबंधी ठराव संमत करण्यात आला.