Canacona News: काणकोण शहरातील विकास अत्यावश्यक असल्यामुळे चार-रस्ता ते काणकोण पोलिस स्टेशनपर्यंतचे पथदीप खांब बदलणे, जीर्ण पदपथ व अरुंद रस्ता यासंबंधी उपाययोजना करण्याच्या दिलेल्या निवेदनाला मुख्यमंत्री डाॅ. प्रमोद सावंत यांनी 8 रोजी मंजुरी दिली असल्याने नगराध्यक्ष रमाकांत नाईक गावकर यांनी मुख्यमंत्री व सभापतींना धन्यवाद दिले आहेत.

यासंबंधीचा प्रस्ताव सभापती तवडकर यांच्या वाढदिवसानंतर सभापती तवडकर यांच्या नेतृत्वाखाली मुख्यमंत्र्यांना सादर करण्यात आला होता.

यावेळी नगराध्यक्ष नाईक गावकर, उपनगराध्यक्ष नादीन फर्नांडिस, नगरसेवक सायमन रिबेलो, लक्ष्मण पागी, भाजप मंडळाचे अध्यक्ष विशाल देसाई, जीसीएचे उपाध्यक्ष शांबा नाईक देसाई आदी उपस्थित होते.

काणकोणात नवीन रवींद्र भवनची वास्तू सज्ज होत असताना तेथील भागाचे सौंदर्यीकरण व्हायला हवे या उद्देशाने काणकोण पालिका मंडळाने मुख्यमंत्री डाॅ. सावंत यांची भेट घेऊन शहराच्या विकासाची मागणी केली, त्याला काल संध्याकाळी मंजुरी दिली असल्याचे पत्र सभापती कार्यालयाला प्राप्त झाले.

या प्रस्तावांतर्गत चार-रस्ता ते काणकोण पोलिस स्थानकापर्यंत रस्त्याचे चौपदरीकरण, पदपथ, नवीन पथदीप खांब, अत्याधुनिक पथदीप, सौंदर्यीकरण आदी कामे करण्यात येणार आहेत.

या प्रस्तावाला मंजुरी मिळाल्याने नगराध्यक्ष, उपनगराध्यक्ष, नगरसेवक यांनी मुख्यमंत्री, सभापती व आमदार तवडकर यांना धन्यवाद दिले आहेत.