Goa Congress म्हापसा कळंगुट मतदारसंघात अवैद्य धंदे फोफावले असून, मुख्यमंत्र्यांपासून स्थानिक पंचायतींना याचे कथित हिस्से पोहचत असल्याने हे प्रकार बंद होत नाहीत. मुख्यतः कळंगुट क्षेत्र सध्या बेकायदेशीर कृत्यांचे केंद्रस्थान (रिंग) बनले आहे, असा आरोप कळंगुट काँग्रेस गट समितीने केला.

सोमवारी (ता.७) येथील काँग्रेस कार्यालयात आयोजित पत्रकार परिषदेला या गट समितीचे अध्यक्ष लॉरेन्सो सिल्वेरा, गोवा प्रदेश युवा काँग्रेस उपाध्यक्ष विवेक डिसिल्वा, सुदिन नाईक, राजन कोरगांवकर, राजेश कांदोळकर, सचिन वेंगुर्लेकर, ज्यो डिकोस्ता व इतर उपस्थित होते.

विवेक डिसिल्वा म्हणाले की, कळंगुट क्षेत्रात राजरोजपणे बेकायदेशीर धंदे सुरू आहेत. वेश्या व्यवसाय तसेच कथित डान्सबारच्या नावाने पर्यटकांची लुबाडणूक होत आहे. सध्या कळंगुटमध्ये स्थानिक पंचायत, आमदारापासून सरकार सुद्धा भाजपाचेच आहे.

तरीही या बेकायदा गोष्टींवर कुणाचेच नियंत्रण नाही. यासंदर्भात समितीकडून स्थानिक पोलिस निरीक्षकांना लवकरच निवेदन सादर केले जाईल, असेही ते म्हणाले.

लोकप्रतिनिधींना जाब विचारण्याची गरज !

मुख्यमंत्री, स्थानिक पंचायत तसेच आमदारांना या बेकायदा गोष्टींचे हफ्ते (हिस्सा) पोहचत असल्याचा आरोप सुदिन नाईक यांनी केला. सत्ताधारी लोकप्रतिनिधी तसेच सरकार फक्त रडण्याचे केवळ ढोंग करीत आहे.

आमदार हे काही स्थानिकांना घेऊन याविषयी मुख्यमंत्र्यांना भेटणार असे सांगतात. मुळात आमदार हे भाजपाचे तर पंचायत मंडळावर भाजपाचे वर्चस्व आहे, मग हा अवैध प्रकार कसा थांबवत नाही ? असा सवाल त्यांनी उपस्थित केला.

मुळात स्थानिकांनी सत्ताधारी लोकप्रतिनिधींना याविषयी जाब विचारण्याची आवश्यकता असल्याचे ते म्हणाले.