Goa Cabinet Reshuffle

पणजी: गोवा मंत्रिमंडळात फेरबदल होण्याच्या चर्चा गेल्या काही दिवसापासून सुरु आहेत. अनेक नेत्यांसह सभापती रमेश तवडकर देखील मंत्रिपदाच्या शर्यतीत असताना यात आणखी एक नाव पुढे आले आहे. विधानसभेचे उपसभापती जोशुआ डिसोझा यांनी त्यांना मंत्रिपदाची ऑफर मिळण्यास ती स्विकारण्यास तयार असल्याचे त्यांनी म्हटले आहे.

भाजप प्रदेशाध्यक्ष सदानंद शेठ तानावडे यांनी नुकतेच मंत्रिमंडळ फेरबदलाचे संकेत दिले आहेत. नव्या वर्षात लवकरच बदल होण्याची शक्यता त्यांनी माध्यमांसोबत बोलताना व्यक्त केली. फेरबदलाच्या चर्चांना पुन्हा उधाण आल्याने तशा राजकीय हालचाली देखील होताना दिसत आहेत.

गेल्या काही दिवसांपूर्वी सभापती रमेश तवडकर यांना मंत्रिपद देण्याबाबत चर्चा समोर येत होत्या. त्यानंतर आता म्हापसा आमदार जोशुआ डिसोझा यांनी देखील त्यांना मंत्रिपद देण्याबाबत राज्य आणि केंद्रातील नेत्यांकडून प्रस्ताव आल्यास तो स्विकारणार असे म्हणाले आहेत.

दरम्यान, संभाव्य मंत्रिमंडळाच्या फेरबदलात नव्या चेहऱ्यांना संधी देण्याची चर्चा आहे. पण, यात आत्तापर्यंत जोशुआ यांचे नाव समोर आले नव्हते. पण, त्यांनी स्वत: तसा प्रस्ताव आल्यास आपण तयार असल्याचे भाष्य केल्याने विविध तर्क वितर्क लावले जात आहेत. यापूर्वी सभापती रमेश तवडकर यांचे देखील नाव समोर आले होते.

प्रदेशाध्यक्ष तानावडे यांच्या वक्तव्याने फेरबदलाच्या चर्चांना पुन्हा उधाण आले खरे पण फेरबदल केव्हा होणार याबाबत निश्चित माहिती समोर आलेली नाही. दुसरीकडे मात्र इच्छुकांची यादी वाढत जात असल्याचे चित्र आहे. असे असले तरी अखेरचा निर्णय राज्य आणि केंद्रातील वरिष्ठ नेतेच घेतील.