पणजी: गणेश चतुर्थीच्या पार्श्वभूमीवर नारळांच्या वाढलेल्या दरामुळे ग्राहकांना दिलासा देण्यासाठी गोवा राज्य फलोत्पादन महामंडळाने तब्बल ७० हजार नारळांची खरेदी केली आहे. हे नारळ गुरुवारपासून अनुदानित दरात विक्रीसाठी उपलब्ध करून देण्यात येणार असल्याची माहिती सूत्रांनी दिली.

सध्या खुल्या बाजारात नारळाचे दर ६० ते ७० रुपये प्रतिनग इतके आहेत. मात्र, महामंडळाकडून ‘ना नफा, ना तोटा’ तत्त्वावर प्रतिनारळ ३८ रुपये दराने विक्री केली जाणार आहे. ९ सप्टेंबरपासून गणेशचतुर्थीच्या अकराव्या दिवसापर्यंत ही विक्री सुरू राहणार आहे.

राज्यभरातील महामंडळाच्या १७ केंद्रांवर, फलोत्पादन खात्याच्या दुकानांमध्ये तसेच अधिकृत विक्रेत्यांमार्फत नारळ उपलब्ध करून दिले जाणार आहेत. चतुर्थीच्या काळात मागणी वाढत असल्याने सर्वसामान्य ग्राहकांना बाजारभावाच्या तुलनेत कमी दरात नारळ मिळावा, या उद्देशाने ही व्यवस्था करण्यात आली आहे.