Bombay High Court At Goa मुंबई उच्च न्यायालयाच्या गोवा खंडपीठाचे निकाल आता कोकणी भाषेतूनही मिळणार आहेत. त्यामुळे गोमंतकीयांना याचा सर्वाधिक लाभ मिळणार आहे. यापूर्वी हे निकाल इंग्रजीसह मराठीतून उपलब्ध होत होते.

कोकणी ही गोव्याची राजभाषा असल्याने राज्य सरकार विविध मार्गांनी कोकणी भाषेचे संवर्धन, जतन करण्याचा प्रयत्न करीत आहे. त्यातून केलेल्या प्रयत्नांना यश आले असून आता हायकोर्टाचे निकाल देखील कोकणी भाषेतून उपलब्ध केले जाणार आहेत.

गोवा राजभाषा संचलनालयाच्या सहकार्याने या निकालांचे कोकणी भाषेमध्ये भाषांतर केले जाणार आहे. सर्वसामान्य गोवेकरांना याचा मोठा लाभ होणार आहे.

कारण गोव्यात कोकणी भाषिकांची संख्या मोठी आहे. येथील बोलीभाषेत बहुसंख्य नागरीक कोकणीचाच वापर करतात. तसेच कोकणीच्या संवर्धन, जतनासाठी येथे प्रयत्न होत असतात.

अधिवेशनात कोकणी भाषा भवनाचा पुनरूच्चार

सध्या सुरू असलेल्या पावसाळी विधानसभा अधिवेशनात देखील मुख्यमंत्री डॉ. प्रमोद सावंत यांनी कोकणी भाषा भवन बांधणार असल्याचा पुनरूच्चार केला होता. तसेच प्राचीन दस्तऐवज कोकणीत भाषांतरीत करणार असल्याचेही त्यांनी सांगितले होते.

दरम्यान, कोकणी भाषांतरकार मिळत नसल्यावरून त्यांनी खंतही व्यक्त केली होती. राज्यात कोकणी भाषांतर करणे कठीण झाले आहे.

त्यासाठी भाषा संचालनालयाकडून विशेष उपक्रम राबविले जातील. विद्यार्थी कोकणी भाषेचा अभ्यास कसा करतील, यासाठी प्रयत्न केले जातील, असेही मुख्यमंत्री प्रमोद सावंत यांनी म्हटले आहे.

न्यायालये आपले निकाल यापुढे कोकणी भाषेतून देणार असतील तर ती अत्यंत चांगली आणि स्वागतार्ह गोष्ट आहे. न्यायदान हे सामान्य लोकांसाठी असते आणि त्यांना समजेल त्या भाषेतून त्याचा निकाल देणे ही गरज आहे. आणि तो लोकांचा अधिकारही आहे. या निकालांचा इतरांनाही त्यामुळे फायदा होईल, असे वाटते.

- अन्वेशा सिंगबाळ (अध्यक्ष, कोकणी भाषा मंडळ)