Goa BJP State President Election

डिचोली: भाजपच्या गोवा प्रदेशाध्यक्ष पदासाठी पुन्हा सदानंद शेट तानावडे यांचे नाव चर्चेत आहे. तानावडे हे शनिवारी एका कार्यक्रमानिमित्त मये येथे आले होते. त्यावेळी पत्रकारांशी संवाद साधताना तानावडे यांनी प्रदेशाध्यक्ष निवडीसंदर्भात आपणही इच्छुक असल्याचे अप्रत्यक्षपणे मान्य केले. पक्ष नेतृत्वाने पुन्हा संधी दिल्यास ती स्वीकारण्यास मी तयार आहे, असेही ते म्हणाले.

२० जानेवारीपर्यंत भाजपच्या गोवा राज्य प्रदेशाध्यक्षांची निवड अपेक्षित असून, केंद्रीय नेतृत्व नवीन प्रदेशाध्यक्ष ठरविणार आहे, अशी माहिती तानावडे यांनी दिली.

'टूलकिट' प्रकरण फारसे गंभीर नसून, तो मीडियाकडून केला जाणारा अपप्रचार आहे, असे म्हणत तानावडे यांनी याप्रकरणी अधिक भाष्य करण्याचे टाळले. २०२० साली भाजपच्या प्रदेशाध्यक्षपदी निवड झाल्यानंतर पाच वर्षांचा कार्यकाळ मी यशस्वीरित्या पूर्ण केला.

भाजपचे कार्य मजबूत करताना प्रदेशाध्यक्ष पदाला न्याय मिळवून दिला आहे. भाजप हा सामान्य कार्यकर्त्यांचा पक्ष आहे. प्रामाणिकपणे कार्य करणाऱ्या प्रत्येक कार्यकर्त्याचा पक्षात सन्मान करण्यात येतो.

त्यामुळे नवीन प्रदेशाध्यक्ष कोण, याचा आताच अंदाज बांधणे बरोबर नाही, असेही तानावडे म्हणाले. नवीन प्रदेशाध्यक्ष कोण असावा, त्याबाबतीत पक्षाचे केंद्रीय नेतृत्व निर्णय घेणार आहे.