पणजी: भारतीय जनता पक्षाच्या संघटनात्मक विस्ताराला अधिक गती देण्याच्या उद्देशाने भाजप मुख्यालयात प्रवासी विस्तारकांची कार्यशाळा आयोजित करण्यात आली. या कार्यशाळेत भाजपचे गोवा प्रदेशाध्यक्ष दामू नाईक, भाजपचे राष्ट्रीय सहसंघटनमंत्री शिवप्रकाश, राष्ट्रीय संघटक व्ही. सतीश आणि मुख्यमंत्री डॉ. प्रमोद सावंत यांनी उपस्थितांना मार्गदर्शन केले.

या कार्यशाळेला भाजपचे नेते अनिल अँटोनी, सर्वानंद भगत, मंडळ प्रभारी, मंडळ अध्यक्ष तसेच पक्षाचे अन्य ज्येष्ठ पदाधिकारी उपस्थित होते. पक्षाची संघटनात्मक ताकद वाढविणे, तळागाळातील कार्यकर्त्यांचे जाळे अधिक सक्षम करणे आणि संघटनात्मक उपक्रमांना नव्याने गती देणे, हा कार्यशाळेचा प्रमुख उद्देश होता.

राष्ट्रीय स्तरावरील संघटनात्मक नेतृत्व आणि राज्यातील प्रमुख नेत्यांच्या उपस्थितीमुळे या कार्यशाळेला विशेष महत्त्व प्राप्त झाले. पक्षाच्या संघटनात्मक कामकाजात समन्वय वाढविणे, स्थानिक पातळीवरील पक्षयंत्रणा अधिक गतिमान करणे आणि तळागाळातील संपर्क मजबूत करणे, यावर मार्गदर्शन करण्यात आले. आगामी काळात पक्षाचे संघटन अधिक मजबूत करण्यासाठी प्रवासी विस्तारकांनी सक्रियपणे काम करावे, या दृष्टीने कार्यशाळेचे आयोजन करण्यात आले होते.

विस्तारकांची भूमिका महत्त्वाची

प्रवासी विस्तारकांच्या माध्यमातून पक्षाचे संघटन अधिक व्यापक करण्यावर या कार्यशाळेत लक्ष केंद्रित करण्यात आले. विविध भागांमध्ये पक्षाचे कार्य पोहोचविणे, स्थानिक पातळीवरील संघटनात्मक संपर्क वाढविणे आणि कार्यकर्त्यांना अधिक सक्रिय करणे, या दृष्टीने विस्तारकांची भूमिका महत्त्वाची ठरणार आहे.