Goa BJP राज्यसभा सदस्य म्हणून दिल्लीत नवी इनिंग सुरू केल्यानंतरही भाजपचे प्रदेशाध्यक्ष सदानंद शेट तानावडे यांनी शनिवार व रविवार हे संसदेच्या सुटीचे दिवस पक्ष कार्यासाठी दिले आहेत.

दिवसभर ते पक्षाच्या विविध बैठकांत व्यस्त राहिले. आमदार मायकल लोबो यांच्या निवासस्थानी भेट देत त्यांनी पक्ष कार्यकर्त्यांशी संवाद साधला.

सायंकाळी ते आपल्या राज्यासह तामिळनाडू, केरळ आणि लक्षद्वीपमधील पंचायत सदस्य प्रशिक्षण शिबिरासाठी उपस्थित राहिले.

दोनापावल येथेच भाजपच्या निवडक नेत्यांची बैठकही त्यांनी घेतली. त्या बैठकीत मुख्यमंत्रीही सहभागी झाले होते.

तानावडे यांनी दिवसभराच्या धावपळीतून वेळ काढत कळंगुट येथील भाऊ वेर्लेकर या पक्षाच्या 80 वर्षाच्या कार्यकर्त्याच्या घरी भेट घेऊन शुभेच्छा दिल्या. 14 ऑगस्ट रोजी विभाजन विभीषण स्मृती दिवस पाळण्यासाठीच्या कार्यक्रमाचा आढावा घेतला आणि ती जबाबदारी सरचिटणीस दामोदर नाईक यांच्याकडे सोपवली.

त्याशिवाय मेरा देश मेरा भारत योजनेंतर्गत मोटारसायकल फेरीसह 9 ते 15ऑगस्टपर्यंत विविध कार्यक्रम आयोजित करण्यासाठी सरचिटणीस ॲड. नरेंद्र सावईकर यांच्याकडे जबाबदारी दिली. पीर्ण येथील विद्यालयाच्या सभेलाही उपस्थिती दर्शवली.

संघटनात्मक कामाचा आढावा

आमदार प्रेमेंद्र शेट, दाजी साळकर, उल्हास नाईक तुयेकर, संकल्प आमोणकर आणि केदार नाईक यांना विधानसभा निवडणूक होणाऱ्या राज्यातील प्रत्येकी एका मतदारसंघात संघटनात्मक कामाचा आढावा घेण्यासाठी विस्तारक म्हणून 20 ते 27 ऑगस्ट दरम्यान पाठवण्यात येणार आहे.

त्याच्या पूर्वतयारीची आणि तेथे नेमके काय करणे अपेक्षित आहे, याची बैठक तानावडे आज रविवारी घेणार आहेत. त्याशिवाय राज्यातील दोन विधानसभा मतदारसंघाचा दौराही करणार आहेत.