Bhausaheb Bandodkar गोव्‍याचे भाग्‍यविधाते तथा पहिले मुख्‍यमंत्री भाऊसाहेब बांदोडकर यांनी गोवा राज्याला साक्षर बनविण्‍यासाठी गावोगावी शाळा सुरू केल्‍या. त्‍यासाठी शिक्षकांची फौज तयार केली. त्‍यामुळेच आज गोवा राज्‍य पूर्णपणे साक्षर बनले.

ही साक्षरता गोव्याच्या आणि देशाच्या समृद्धतेसाठी उपयोगात आणणे आवश्‍यक आहे, असे उद्‌गार फोंड्याचे आमदार तथा कृषीमंत्री रवी नाईक यांनी काढले.

फर्मागुढी-फोंडा येथे भाऊसाहेब बांदोडकर यांच्या सुवर्णमहोत्‍सवी पुण्‍यतिथीनिमित्त आयोजित कार्यक्रमात नाईक बोलत होते. यावेळी फोंडा नगराध्य रितेश नाईक, नगरसेवक रुपक देसाई, सामाजिक कार्यकर्ते हनुमंत नाईक व भाऊप्रेमींची मोठी उपस्थिती होती.

भाऊसाहेबांनी गोव्याच्या विकासाला पहिले प्राधान्य दिले. राज्यात आणलेले विविध विकासप्रकल्प ही त्याची साक्ष होय. औद्योगिक विकासाबरोबरच मानवी विकासासाठी त्यांनी उपक्रम

राबविले. शिक्षण हे महत्त्वाचे असल्‍याचे जाणून त्‍यांनी शाळा, विद्यालये सुरू केली. तसेच ग्रामीण भागातील लोकांना साक्षरतेसाठी उद्युक्त केले. त्‍यांनी गोव्याच्या विकासासाठी केलेले कार्य उल्लेखनीय असेच आहे. आजचा समृद्ध गोवा हा भाऊसाहेबांच्या संकल्पनेतूनच साकारला गेला आहे, असे रवी नाईक म्‍हणाले.

यावेळी उपस्‍थित मान्‍यवरांनीही भाऊंच्‍या कार्याबद्दल विचार मांडले. तसेच त्‍यांनी भाऊसाहेब बांदोडकर यांच्‍या पुतळ्‍याला पुष्‍प वाहिले. यावेळी नागरिक आणि भाऊप्रेमींची मोठी उपस्‍थिती होती.

विकासाची पायाभरणी भाऊसाहेबांमुळेच : दीपक ढवळीकर

भाऊसाहेब बांदोडकर यांनी गोव्याच्या समृद्धतेकडे लक्ष देताना मोठमोठे प्रकल्प राज्यात आणले. गोव्याच्या विकासाची खरी पायाभरणी ही त्‍यांनीच केली. म्हणूनच आज गोवा समृद्ध झाला, असे उद्‌गार माजी मंत्री तथा मगो पक्षाचे अध्यक्ष दीपक ढवळीकर यांनी काढले.

फर्मागुढीत भाऊसाहेब बांदोडकर यांच्या पुतळ्याला पुष्पांजली अर्पण केल्यानंतर ते बोलत होते. यावेळी जिल्हा पंचायत सदस्य गणपत नाईक, डॉ. केतन भाटीकर, दामोदर नाईक, प्रिया च्यारी, सरपंच सुखानंद कुर्पासकर, शैलेंद्र पणजीकर, इतर सरपंच व पंचसदस्य, मगो पक्षाचे युवा नेते मिथिल ढवळीकर आणि मगोचे कार्यकर्ते उपस्थित होते.

भाऊंनी घेतले बहुजनांच्‍या हिताचे निर्णय : गोविंद गावडे

बराच काळ पिचत पडलेल्या बहुजन समाजाचे हिताचे निर्णय भाऊसाहेब बांदोडकर यांनी घेतले. त्यामुळे बहुजन समाज मान वर करून बोलू शकला. पण आज ती परिस्थिती राहिलेली नाही. बहुजन समाजील लोक समाजातील लोकांचेच पाय ओढत आहेत, अशी खंत कला व संस्कृती खात्याचे मंत्री गोविंद गावडे यांनी व्‍यक्त केली.

फर्मागुढी येथे भाऊसाहेब बांदोडकर यांच्या पुतळ्याला पुष्पहार अर्पण करून अभिवादन केल्यानंतर ते बोलत होते. यावेळी विश्‍वास गावडे व मान्यवर मंडळी उपस्थित होती. गावडे म्हणाले की, भाऊसाहेबांनी सर्वांना सोबत घेऊन राज्याचा विकास केला.

अनेक धोरणात्मक निर्णय घेतले. त्यामुळेच आज गोवा समृद्धतेच्या वाटेवर पोचू शकला. भाऊसाहेबांच्या दूरदृष्टीमुळे गोवा शैक्षणिक, औद्योगिक, सांस्कृतिक आणि आरोग्य अशा विविध क्षेत्रात भरारी मारू शकला, असेही गावडे म्‍हणले.