सावंतवाडी: गोव्यात बहिणीकडे भाऊबीजेची ओवाळणी करून परतणाऱ्या वीस वर्षीय युवकाचा दुर्दैवी मृत्यू झाल्याची घटना आज हसापूर मार्गावर घडली. विलवडे (ता. सावंतवाडी) येथील ऋषिकेश बापूजी दळवी (वय २०) हा आपल्या बहिणीकडे गोव्यातील हसापूर येथे भाऊबीजेसाठी गेला होता.

दुपारी झालेली ओवाळणी हीच त्याची शेवटची ठरली. सायंकाळी तो विलवडे येथे परत येत असताना मुसळधार पावसात रस्त्यावर नियंत्रण सुटल्याने त्याची दुचाकी झाडावर आदळली.

या भीषण धडकेत ऋषिकेशचा जागीच मृत्यू झाला. अपघातानंतर परिसरात एकच खळबळ उडाली. घटनेची माहिती मिळताच मोपा पोलिसांनी घटनास्थळी धाव घेऊन पंचनामा केला.

मृतदेह बांबोळी येथील गोवा वैद्यकीय महाविद्यालय (जीएमसी) इस्पितळात पोस्टमार्टमसाठी पाठविण्यात आला आहे. तरुण ऋषिकेशच्या मृत्यूने विलवडे गावात शोककळा पसरली असून भाऊबीजेच्या दिवशीच घडलेले हे दुर्दैवी निधन हृदय पिळवटून टाकणारे ठरले आहे.