Banastarim Bridge Accident बाणस्तारी अपघात प्रकरणात कार परेश सावर्डेकर हा चालवत असल्याच्या साक्षी नोंदवल्या आहेत. मात्र, कोणीही साक्षीदार स्वतःहून साक्ष देण्यात पुढे येत नाही. त्यामुळे मेघना कार चालवत होती, यासंदर्भातील एकही पुरावा किंवा साक्षीदार माहिती देण्यास पुढे आलेला नाही.

परेशच कार चालवत होता, असे गृहीत धरून तपास करण्यात येत आहे. तपासावेळी केलेल्या वैद्यकीय चाचण्यांचे अहवाल तसेच कारच्या स्टेअरिंगवर हाताच्या बोटांचे ठसे आदी नमुन्यांच्या चाचण्यांचे अहवाल येणे बाकी आहे, अशी बाजू सरकारी वकील शैलेंद्र भोबे यांनी आज मांडली.

अखेर 18 दिवसांनी परेशला जामीन

या प्रकरणाचा तपास पूर्ण होत आल्याने कारचालक परेश याची कोठडी आवश्‍यक नसल्याची माहिती पोलिसांतर्फे सरकारी वकिलांनी आज दिल्याने खंडपीठाने परेशला सशर्त जामीन मंजूर केला. अपघातावेळी परेशच कार चालवत होता, हे साक्षीदारांच्या जबानीत निष्पन्न झाले आहे. मेघनाविरुद्ध कोणतेच पुरावे नाहीत आणि साक्षीदारही साक्ष देण्यास पुढे येत नाहीत.

मेघनाच्या जामिनावर आज सुनावणी

संशयित परेश सावर्डेकर याची पत्नी मेघना सावर्डेकर हिने फोंडा न्यायालयात अटकपूर्व जामिनासाठी अर्ज केला आहे. सध्या तिला अंतरिम जामीन न्यायालयाने दिला आहे. ही सुनावणी २३ ऑगस्ट रोजी ठेवली होती. मात्र, तिच्या दोन मुलांची न्यायदंडाधिकाऱ्यांसमोर जबानी घेण्यात येत असल्याने ती २५ ऑगस्टपर्यंत तहकूब करण्यात आली आहे.